پاکستانی شوبز انڈسٹری کی سینئر اداکارہ بشری انصاری نے کہا ہے کہ عام طور پر لڑکیاں اس خیال سے ہی خوش ہو جاتی ہیں کہ کوئی ان سے محبت کرتا ہے جس کے باعث وہ جلد محبت میں مبتلا ہو جاتی ہیں اور دھوکے کا شکار ہونے کا امکان بڑھ جاتا ہے۔
حال ہی میں اپنے یوٹیوب وی لاگ میں بشری انصاری نے نوجوان لڑکیوں اور خواتین کو شادی کے رشتوں کے نام پر دئیے جانیوالے دھوکوں پر گفتگو کرتے ہوئے کہا کہ یہ رجحان نہ صرف ہمارے معاشرے بلکہ بھارتی اور انگریزی فلموں میں بھی واضح طور پر دیکھا جا سکتا ہے کہ جیسے ہی کوئی لڑکا شادی کی پیشکش کرتا ہے، لڑکی خوشی سے حیران رہ جاتی ہے، اگر لڑکا انگوٹھی دیدے تو بعض لڑکیوں کی خوشی کی انتہا نہیں رہتی حالانکہ صرف شادی کی پیشکش کو زندگی کی سب سے بڑی کامیابی سمجھنا درست نہیں، آخر لڑکیوں میں یہ ذہنیت کیوں پروان چڑھتی ہے کہ محض رشتہ آ جانا ہی سب کچھ ہے۔
انکا کہنا تھا کہ ہمارے معاشرے میں لڑکیوں کو اس انداز سے پالا جاتا ہے کہ شادی کی پیشکش مل جانا ہی انکی زندگی کا مقصد بن جاتا ہے جیسے وہ کسی پر بوجھ ہوں اور کسی نے انہیں قبول کر لیا ہو، لڑکیوں کو چاہئے کہ وہ شادی کے فیصلے میں مردوں کے کردار، عادات اور اخلاقیات کو پرکھیں، بغاوت کی ترغیب نہیں دے رہیں صرف یہ چاہتی ہوں کہ لڑکیاں ہوشمندی سے فیصلے کریں اور زیادہ محتاط رہیں کیونکہ محض یہ سوچ کہ اس میں کئی خرابیاں ہیں مگر اس نے مجھے رشتہ تو دیا ہے ایک خطرناک اور تشویشناک رویہ ہے۔
