روس نے وینزویلا جانیوالے آئل ٹینکر کو بچانے کیلئے میدان میں آتے ہوئے امریکا کو خبردار کیا ہے کہ وہ بحر اوقیانوس میں موجود وینزویلا کے آئل ٹینکر کا مسلسل پیچھا کرنا بند کرے، یہ کارروائی بین الاقوامی قوانین کے منافی ہے اور صورتحال کو مزید کشیدہ بنا سکتی ہے۔
غیر ملکی میڈیا کے مطابق وینزویلا کا آئل ٹینکر جہاز بیلا ون اسوقت بحر اوقیانوس میں موجود ہے اور امریکی کوسٹ گارڈ کی گرفت سے بچنے کی کوشش کر رہا ہے تاہم امریکی افواج گزشتہ تقریباً دو ہفتے سے جہاز کا مسلسل تعاقب کر رہی ہیں، امریکا کا کہنا ہے کہ ٹینکر تیل کی سمگلنگ میں ملوث ہے اور وینزویلا کیلئے غیر قانونی طور پر تیل لے جا رہا ہے، وینزویلا کے تیل شعبے پر دبائو بڑھانے کیلئے ٹرمپ کی انتظامیہ نے چار کمپنیوں پر پابندیاں عائد کی تھیں جو وینزویلا کے آئل سیکٹر میں سرگرم ہیں، ان پابندیوں کا مقصد وینزویلا کے صدر نکولس مادورو پر سیاسی اور معاشی دبائو میں اضافہ کرنا ہے۔
دوسری جانب روس نے امریکا کو خبردار کیا ہے کہ وہ اس معاملے میں مداخلت سے باز رہے اور جہاز کے تعاقب سے فوری طور پر دستبردار ہو جائے، امریکا کی اس نوعیت کی کارروائیاں خطے میں کشیدگی کو مزید بڑھا سکتی ہیں۔
