فیفا ورلڈ کپ 2026 کے ٹکٹوں کیلئے جاری رینڈم سلیکشن ڈرا مرحلے میں شائقین غیر معمولی دلچسپی لے رہے ہیں اور ڈرا کے نصف تک پہنچتے ہی انکی غیر معمولی دلچسپی کے نئے ریکارڈ قائم ہوگئے ہیں۔
غیر ملکی میڈیا کے مطابق اب تک ٹکٹوں کیلئے 200 سے زائد ملکوں سے 150ملین سے زیادہ درخواستیں موصول ہو چکی ہیں۔
11دسمبر 2025کو شروع ہونیوالے اس مرحلے کے مطابق تصدیق شدہ کریڈٹ کارڈ ڈیٹا کی بنیاد پر یہ ایونٹ دستیاب ٹکٹوں کے مقابلے میں 30 گنا زیادہ سبسکرائب ہو چکا ہے جبکہ یہ طلب 1930 سے اب تک ہونیوالے تمام ورلڈ کپ مقابلوں میں شریک مجموعی شائقین سے بھی کہیں زیادہ ہے۔
فیفا کے صدر جیانی انفانٹینو کے مطابق ورلڈ کپ 2026دنیا کا سب سے بڑا اور جامع فٹبال ایونٹ ہوگا جو عالمی اتحاد اور کھیل سے محبت کا شاندار مظہر بنے گا، میگا ایونٹ 11 جون سے 19 جولائی 2026 تک کینیڈا، میکسیکو اور امریکا کے 16 شہروں میں کھیلا جائیگا جس میں 48 ٹیمیں 104 میچز میں حصہ لیں گی، ٹکٹس کیلئے موجودہ مرحلہ 13جنوری 2026تک جاری رہے گا اور درخواست دینے کے وقت سے کامیابی کے امکانات متاثر نہیں ہونگے اس مرحلے میں ٹکٹوں کی قیمتیں برقرار رکھی گئی ہیں جبکہ فیفا نے شائقین کیلئے 60 ڈالر کی مخصوص سپورٹر انٹری ٹکٹ کی سہولت بھی متعارف کرائی ہے، ناکام درخواست دہندگان کو آئندہ مراحل میں دوبارہ موقع دیا جائیگا جبکہ پریمیم اور سفری پیکیجز بھی دستیاب ہیں۔
