نادرا نے چہرے کی شناخت پر مبنی بائیومیٹرک تصدیقی سہولت کا آغاز کردیا جس سے بزرگوں یا طبی مسائل کے باعث شہریوں کو فنگر پرنٹس کی تصدیق میں دشواری کا مسئلہ ختم ہو گیا۔
ترجمان نادرا کے مطابق وزیراعظم و وزیرداخلہ کی ہدایت پر نادرا نے شہریوں کی سہولت کیلئے کئی اقدامات اٹھائے ہیں جس کے تحت قومی شناختی کارڈ قوانین میں ترمیم کے ذریعے بائیومیٹرک کی تعریف وسیع اور پاک آئی موبائل ایپ پر چہرے کی شناخت سے بائیومیٹرک تصدیق کی سہولت فراہم کی گئی ہے۔
ترجمان کے مطابق 20 جنوری سے تمام نادرا مراکز میں چہرے کی شناخت پر مبنی بائیومیٹرک تصدیقی سرٹیفکیٹ کا اجرا کیا جائے گا جہاں شہری ضرورت پڑنے پر معمولی فیس کے عوض سرٹیفکیٹ حاصل کر سکیں گے۔
ترجمان کے مطابق فنگر پرنٹس کی تصدیق نہ ہونے پر شہری قریبی نادرا رجسٹریشن مرکز جائے گا اور چہرے کی شناخت کی کارروائی مکمل ہونے پر نادرا ایک سرٹیفکیٹ جاری کرے گا، اس پر تصویر، شناختی کارڈ نمبر، نام، ولدیت، منفرد ٹریکنگ آئی ڈی اور کیو آر کوڈ ہوگا اور یہ سرٹیفکیٹ 7 دن کیلئے قابل استعمال ہوگا۔
ترجمان کے مطابق نادرا اس نظام کے نفاذ کیلئے مکمل طور پر تیار ہے، اس حوالے سے متعلقہ سرکاری و نجی اداروں سے ضروری اقدامات کی درخواست کر دی گئی ہے، 20 جنوری کے بعد سہولت کی دستیابی سے متعلق شکایت پر متعلقہ ادارے یا محکمے کو شکایت کی جا سکے گی۔
ترجمان کے مطابق ڈیجیٹل آئی ڈی کے اجرا کے بعد یہ سہولت پاک آئی ڈی موبائل ایپ پر بھی فراہم کی جائیگی۔
