ترکیہ کے صدر رجب طیب اردوان نے اسرائیل کی جانب سے خود ساختہ جمہوریہ صومالی لینڈ کو باضابطہ طور پر تسلیم کرنے کے فیصلہ کو غیر قانونی قرار دیتے ہوئے کہا ہے کہ اسرائیل کایہ فیصلہ ناقابل قبول ہے اور یہ اقدام افریقہ میں عدم استحکام کو بڑھا سکتا ہے۔
استنبول میں صومالیہ کے صدر حسن شیخ محمود کے ہمراہ مشترکہ پریس کانفرنس سے خطاب کرتے ہوئے انہوں نے کہا کہ ترکیہ صومالیہ کی خودمختاری اور علاقائی سالمیت کی مکمل حمایت کرتا ہے اور کسی بھی یکطرفہ اقدام کو تسلیم نہیں کرتا جو خطے کے امن کیلئے خطرہ بنے، ترکیہ اور صومالیہ کے درمیان طے پانیوالے دو طرفہ معاہدے کے تحت ترکیہ 2026 میں صومالیہ کے ساحلی علاقوں میں توانائی کے وسائل کی تلاش کیلئے کھدائی کا آغاز کریگا منصوبے کیلئے دو نئے تحقیقی جہاز شامل کیے جائینگے۔
انہوں نے انکشاف کیا کہ ترکیہ نے صومالیہ میں دو طرفہ معاہدوں کے تحت ایک خلائی بندرگاہ قائم کرنے کا بھی منصوبہ بنایا ہے تاہم اس حوالے سے مزید تفصیلات فراہم نہیں کی گئیں۔
