وفاقی وزیر داخلہ محسن نقوی نے وفاقی پولیس اہلکاروں کو آسان و کم اقساط پر پلاٹس و بیرون ملک سکالرشپس دینے کا اعلان کرتے ہوئے کہا ہے کہ نیشنل پولیس فائونڈیشن کو پولیس ملازمین کی فلاح و بہبود کیلئے متحرک ادارہ بنایا جائے گا۔
جاری بیان کے مطابق بدھ کو وزیر داخلہ محسن نقوی نے نیشنل پولیس فائونڈیشن کا دورہ کیا اور اعلی سطحی اجلاس کی صدارت کی جس میں نیشنل پولیس فائونڈیشن کے تمام ڈائریکٹرز، ڈپٹی ڈائریکٹرز اور متعلقہ حکام نے شرکت کی۔
وزیر داخلہ نے نیشنل پولیس اکیڈمی میں زیر تربیت اے ایس پیز کو ہر سال آسان و کم اقساط پر پلاٹس فراہم کرنے ،ملک بھر سے ہر سال 10 انسپکٹرز، سب انسپکٹرز اور اے ایس آئیز کو سکالرشپ پر پولیس سے متعلق کورسز کیلئے بیرونِ ملک بھیجنے کا اعلان کیا۔
وزیر داخلہ نے کہا کہ 15 کانسٹیبلز کے بیٹے یا بیٹیاں جو پاکستان کی بہترین جامعات میں داخلہ حاصل کریں گے، ان کے تعلیمی اخراجات نیشنل پولیس فانڈیشن برداشت کرے گی۔
مزید برآں ہر سال 5 ایس پی یا ایس ایس پی رینک کے افسران کو مصنوعی ذہانت میں ڈگری کیلئے سکالرشپ پر بیرون ملک بھیجا جائے گا۔
وزیر داخلہ نے نیشنل پولیس فائونڈیشن کے وسائل میں مزید اضافے کیلئے جامع پلان طلب کرتے ہوئے ادارے کو خسارے سے نکال کر سرپلس میں لانے پر ٹیم کی کارکردگی کو سراہا۔
وزیر داخلہ نے کہا کہ نیشنل پولیس فائونڈیشن کو پولیس ملازمین کی فلاح و بہبود کیلئے انتہائی فعال اور متحرک ادارہ بنایا جائے گا۔
