حکومت پنجاب نے جنگلی حیات کے تحفظ و ایکو ٹورزم کے فروغ کیلئے 9.4ارب روپے کے دو منصوبوں کی منظوری دیدی۔
ڈائریکٹر جنرل پنجاب وائلڈ لائف مبین الٰہی کے مطابق منصوبوں کا دائرہ کار جہلم، اٹک، چکوال، میانوالی، چھانگا مانگا، لال سہانرہ بہاولپور، صحرائے چولستان اور ڈی جی خان میں کوہِ سلیمان کے پہاڑی علاقے تک ہوگا۔
انہوں نے بتایا کہ پہلا منصوبہ پنجاب وائلڈ لائف کنزرویشن اینڈ ہیبی ٹیٹ ریسٹوریشن پروگرام ہے جس کی لاگت 3.9ارب روپے ہے، منصوبے کے تحت جنگلی حیات کی کم ہوتی آبادی کو مستحکم کرنے، مساکن کی بحالی اور مقامی کمیونٹی کو تحفظ کے عمل میں شامل کیا جائے گا۔
سالٹ رینج کالا چٹا رینج اور کوہِ سلیمان میں کمیونٹی بیسڈ کنزرویسیز قائم کی جائینگی جبکہ اڑیال، چنکارہ اور سلیمان مارخور کی آبادی میں اضافے کیلئے بریڈنگ اور ری انٹروڈکشن کے اقدامات کئے جائینگے۔
اسی طرح منصوبے میں تیتر کی افزائش نسل کیلئے بریڈنگ سنٹر اور کمیونٹی بیسڈ کنزروینسیز بھی ان علاقوں میں بنائی جائیں گی جبکہ متعلقہ علاقوں میں پاڑہ، سانبھر، چیتل ہرنوں اور نیل گائے، کالا ہرن اور چنکارہ کی افزائش نسل و دوبارہ آبادکاری بھی منصوبے میں شامل ہے۔
ڈی جی پنجاب وائلڈ لائف کے مطابق دوسرا منصوبہ ایکو ٹورزم سالٹ رینج و لال سہانرا نیشنل پارکس سے متعلق ہے جس کی مجموعی لاگت 5.5ارب روپے ہے۔
منصوبے کے تحت ایکو لاجز، سیاحوں کیلئے سہولیات، فیملی پکنک ایریاز، ہائیکنگ ٹریکس، ویو پوائنٹس اور دیگر ماحول دوست سیاحتی سرگرمیوں کے انفراسٹرکچر کو فروغ دیا جائیگا۔
سیاحتی رسائی بہتر بنانے کیلئے موٹروے ایم ٹو پر سالٹ رینج کے مقام پر ایک نیا انٹرچینج بھی منصوبے کا حصہ ہے۔
انہوں نے بتایا کہ یہ منصوبے پہلی بار صوبے میں کنزرویشن، سیاحت اور مقامی کمیونٹی کی شراکت کو ایک مشترکہ حکمت عملی کے تحت جوڑ رہے ہیں، ماڈل سے نہ صرف جنگلی حیات اور قدرتی ماحول کو تحفظ ملے گا بلکہ مقامی آبادی کیلئے روزگار اور معاشی مواقع بھی پیدا ہوں گے۔
