ترکیہ میں 2025 کے اختتام اور نئے سال کی آمد پر دہشتگردوں کیخلاف بڑی کارروائی کی گئی ہے جس میں دہشتگردی کی منصوبہ بندی کرنیوالے داعش کے 357 ارکان کو گرفتار کر لیا گیا ہے۔
غیر ملکی میڈیا کے مطابق ترکیہ نے داعش نیٹ ورک کیخلاف بڑے پیمانے پر کارروائی کی اور 12 صوبوں میں مختلف آپریشنز کئے گئے جس کے دوران 357 مشتبہ دہشتگرد گرفتار کر لئے گئے۔
ترک وزیر داخلہ نے کہا ہے کہ گزشتہ روز بھی یالووا میں آپریشن کے دوران 3 پولیس اہلکار شہید اور 6 داعش کے ارکان ہلاک ہوئے تھے، ترک پولیس نے ملک کو دہشتگردی سے بچالیا ہے، دہشتگردی کے راستے پر چلنے والوں کو کبھی موقع نہیں دیا جائیگا۔
ترک حکام کے مطابق گزشتہ دنوں حملوں کی منصوبہ بندی کرنیوالے 137مشتبہ دہشتگرد گرفتار کئے گئے، شامی سرحد پر داعش کی سرگرمیوں کے پیش نظر سخت اقدامات کئے گئے ہیں، ملکی سلامتی اور عوامی تحفظ کیلئے سکیورٹی اداروں کی کارروائیاں جاری رہیں گی۔
وزارت داخلہ کے مطابق ترکیہ دہشتگردی کیخلاف زیرو ٹالرنس پالیسی پر عمل پیرا ہے اور کسی بھی دہشتگرد تنظیم کو ملک میں سرگرم ہونے کی اجازت نہیں دی جائیگی۔
استنبول کے چیف پبلک پراسکیوٹر آفس کی جانب سے بتایا گیا ہے کہ شہر میں 110 ایسے مشتبہ افراد کو گرفتار کیا گیا ہے جو نئے سال کے موقع پر استنبول میں دہشتگردانہ کارروائیوں کا منصوبہ بنا رہے تھے۔
انقرہ کے چیف پبلک پراسیکیوٹر آفس نے داعش سے تعلق رکھنے والے 17 مشتبہ افراد کے وارنٹ گرفتاری جاری کرنے کی تصدیق کی ہے جن میں 11 غیر ملکی شہری شامل ہیں۔
