2025اختتام پذیر ہونے پر کرسمس کے دوران جرمنی میں بینک ڈکیتی کا بڑا واقعہ پیش آیا ہے جس میں بینک والٹ سے 3کروڑ یورو چوری کئے گئے ہیں۔
غیر ملکی میڈیا رپورٹس کے مطابق ڈکیتی کی یہ واردات جرمنی کے مغربی شہر گیلزن کرشن میں واقع سپارکا سے سیونگز بینک میں پیش آئی۔
تفتیش کاروں کے مطابق بینک میں ہونیوالی اس پیچیدہ اور منظم ڈکیتی کا جائزہ لے رہے ہیں کہ چور کس طرح بیرونی راستے سے محفوظ والٹ تک پہنچے اور 3ہزار سے زائد سیف ڈپازٹ باکسز لوٹ لئے۔
پولیس کے مطابق گزشتہ ہفتے کے آخر میں کرسمس کی چھٹیوں کے دوران پیش آنیوالی اس واردات کے شواہد ایک انتہائی منظم کارروائی کی طرف اشارہ کرتے ہیں جس میں 3 کروڑ یورو مالیت کی نقدی، سونا، زیورات اور دیگر قیمتی اشیا چوری ہوئیں۔
پولیس کے ایک ترجمان نے اس منظم ڈکیتی کو مشہور فلم اوشنز الیون سے تشبیہ دی اور اسے نہایت پیشہ ورانہ قرار دیتے ہوئے کہا کہ اس کیلئے وسیع منصوبہ بندی، اندرونی معلومات اور مضبوط مجرمانہ عزم درکار تھے، پولیس کو اس جرم کا علم اسوقت ہوا جب بینک میں فائر الارم بج اٹھا، پولیس کے مطابق ملزمان نے کرسمس کے سیزن کا فائدہ اٹھاتے ہوئے قریبی پارکنگ گیراج کے ذریعے بینک تک رسائی حاصل کی، ایک بڑے ڈرل سے والٹ روم میں سوراخ کیا اور بعد ازاں اسی راستے سے چوری شدہ سامان لے کر فرار ہو گئے۔
