چیف جسٹس پاکستان جسٹس یحییٰ آفریدی نے ضلع تھرپارکر کا دورہ کیا اور انصاف کی فراہمی و عدالتی نظام کا جائزہ لیا۔
سپریم کورٹ کی جانب سے جاری اعلامیہ کے مطابق چیف جسٹس نے لا اینڈ جسٹس کمیشن کے چیئرمین کی حیثیت سے فیلڈ وزٹ کیا، چیف جسٹس سندھ ہائیکورٹ بھی انکے ہمراہ تھے، دورہ آئین میں دی گئی مساوات، شمولیت اور پرامن بقائے باہمی کے عزم کی عکاسی کرتا ہے، چیف جسٹس نے ننگرپارکر کے سول کورٹ کمپلیکس میں عدالتوں کے کام کا معائنہ کیا، عدالتی وقار کیلئے عوامی سہولتوں کی فراہمی پر زور دیا اور خواتین سہولت مرکز، صاف پانی، سولرائزیشن اور ای لائبریری کی سہولتوں کو سراہا۔
اعلامیہ کے مطابق چیف جسٹس نے مختلف بار ایسوسی ایشنز کے نمائندوں سے ملاقات کی جس میں موثر انصاف کیلئے بینچ اور بار کے تعمیری تعاون پر زور دیا گیا، چیف جسٹس نے کاسبو مندر، چوریو جبل درگا ماتا مندر کا بھی دورہ کیا، مذہبی آزادی اور اقلیتوں کے حقوق کے تحفظ کے عزم کا اعادہ کیا، چیف جسٹس نے مٹھی ڈسٹرکٹ کورٹ کمپلیکس میں عدالتی امور کا جائزہ لیا اور کیس مینجمنٹ، انفراسٹرکچر اور خواتین دوست سہولتوں کا معائنہ کیا انہوں نے رسائی، صفائی اور فعالیت سے متعلق خلا کی نشاندہی دستاویزی شکل میں کرنے کی ہدایت کی۔
