وزیراعلی پنجاب ٹریکٹر سکیم کا تیسرا فیز جنوری میں شروع کیا جائے گا، کاشتکاروں کو 50سے 55ہارس پاور کے ٹریکٹرز کی فراہمی کیلئے درخواستیں جنوری کے وسط میں طلب کی جائیں گی جبکہ ہائی ٹیک فارم میکانائزیشن فنانسنگ پروگرام کے تحت 100 سے 120ہارس پاور کے بڑے ٹریکٹرز بھی بلاسود قرضوں پر فراہم کئے جائیں گے۔
اس حوالے سے جاری بیان میں وزیراعلی مریم نواز نے کہا ہے کہ پنجاب کے کاشتکاروں کو ٹریکٹر کی فراہمی کا مقصد معاشی خودمختاری اور زیادہ پیداوار کا حصول ہے، کاشتکار بھائی اپنے ٹریکٹر کے مالک بن رہے ہیں، اس سے بڑھ کر خوشی کی بات اور کیا ہو سکتی ہے۔
انہوں نے کہا کہ حکومت پنجاب کسانوں کو فصل کی بوائی سے لے کر فروخت تک مکمل تعاون فراہم کر رہی ہے، جدید زرعی مشینری کی فراہمی سے پنجاب کاشتکاری میں خود کفیل ہوگا اور حکومت کھوکھلے نعروں کے بجائے عملی طور پر کسانوں کا سہارا بنے گی۔
واضح رہے کہ چیف منسٹر ٹریکٹر سکیم کے تحت کاشتکاروں میں 30 ہزار سبسڈائز ٹریکٹرز کی فراہمی کا عمل جاری ہے، حکومت پنجاب کی جانب سے ہر ہائی ہارس پاور ٹریکٹر پر 10لاکھ روپے سبسڈی دی جا رہی ہے جبکہ ہائی پاور ٹریکٹر سکیم کیلئے مجموعی طور پر 10ارب روپے کی سبسڈی ادا کی جائے گی۔
پہلے فیز میں 50سے 75ہارس پاور کے 10ہزار ٹریکٹرز کاشتکاروں کو فراہم کئے جاچکے ہیں، دوسرے فیز میں 75سے 85ہارس پاور کے مزید 10ہزار ٹریکٹرز کی قرعہ اندازی مکمل ہو چکی ہے جبکہ ان کی فراہمی کا عمل جاری ہے۔
