سابق ڈی جی آئی ایس آئی فیض حمید نے ملٹری کورٹ سے سنائی گئی سزا کیخلاف اپیل دائر کردی۔
غیر ملکی میڈیا کے مطابق انکے وکیل میاں علی اشفاق نے اپیل دائر کرنے کی تصدیق کی اور مزید تفصیلات دئیے بغیر بتایا کہ ہم نے فوجی عدالت کی طرف سے لیفٹیننٹ جنرل فیض حمید کو سنائی گئی سزا کیخلاف اپیل دائر کردی ہے، اپیل رجسٹرار کورٹ آف اپیلز، اے جی برانچ چیف آف آرمی سٹاف کو جمع کرائی گئی۔
رپورٹ کے مطابق پاکستان آرمی ایکٹ کے سیکشن 133Bکے مطابق فیلڈ جنرل کورٹ مارشل کے فیصلے کیخلاف اپیل کرنے کیلئے فیض حمید کے پاس 40 دن کا وقت تھا۔
اپیل کا جائزہ سب سے پہلے کورٹ آف اپیلز کے ذریعے لیا جاتا ہے جس کی سربراہی ایک میجر جنرل یا اس سے اوپر کا افسر کرتا ہے جو آرمی چیف کی جانب سے نامزد کیا جاتا ہے، اسکے بعد آرمی چیف کے پاس سزا کی توثیق، اس پر نظر ثانی یا منسوخ کرنے کا اختیار ہوتا ہے۔
