پنجاب میں ملک کا پہلا اور منفرد سہولت بازار عوام کی توجہ کا مرکز بن گیا ہے، سی ایم سہولت آن دی گوبازار میں ریڑھی بانوں کو باعز ت روزگار اور شہریوں کو معیاری اور سستی اشیا ملنا شروع ہوگئی ہیں، وزیراعلیٰ مریم نواز کی ہدایت پر ریڑھی بانوں کو 400 سے زائد سٹالز کی اوپن قرعہ اندازی کے ذریعے الاٹمنٹ کر دی گئی ہے۔
لاہور میں پہلے مرحلے میں دس مقامات پر سہولت آن دی گو بازار کھل گئے، گلشن راوی، شادمان، مادر ملت، مدینہ مارکیٹ، ٹان شپ، سندر روڈ، کوٹھا پنڈ فیصل ٹائون کے سہولت بازار فعال کر دیئے گئے ہیں، کھاڑک نالہ، اعوان ٹان، ویلنشیا اور شاہدرہ میں بھی سہولت بازار فعال ہو چکے ہیں۔
بازار میں پھل، سبزیاں، چکن اور کریانہ مصنوعات ڈی سی ریٹ پر ملیں گی، سکیورٹی، واش روم اور صفائی کا شاندار اور بہترین نظام کیا گیا ہے جبکہ ڈرائیو تھرو خریداری کی سہولت بھی موجود ہے۔
فروری تک لاہور میں مزید 5 مقامات پر سہولت آن دی گو بازار فعال کئے جائینگے، برکی، صدر، نشتر ٹائون، رائیونڈ فیز ٹو، فیصل ٹائون، مون مارکیٹ اور فیروز والا میں سہولت آن دی گو بازار تکمیل کے آخری مراحل میں ہیں۔
ذرائع کے مطابق دکانداروں نے مریم نواز کا شکریہ ادا کرتے ہوئے کہا ہے کہ اب ہم ریڑھی والے نہیں بلکہ اپنی دکان کے باقاعدہ مالک بن چکے ہیں، سہولت آن دی گو بازار کے ذریعے رمضان بازاروں میں ملنے والی سستی اشیاء سال بھر دستیاب ہونگی۔
وزیراعلیٰ مریم نواز نے سہولت آن دی گو بازار کو مرحلہ وار لاہور کے دیگر علاقوں تک وسیع کرنے کی ہدایت کرتے ہوئے کہا ہے کہ سہولت آن دی گو بازار قائد نواز شریف کے کلین و خوبصورت لاہور کا وژن ہے، ریڑھی بانوں کو اپنی دکانیں ملنے پر جو خوشی ہو رہی ہے اسے محسوس کر سکتی ہوں۔
