اٹلی نے پاکستان کیلئے آئندہ 3 سال میں مجموعی طور پر 10,500 ملازمتوں کا کوٹہ مختص کردیا جس کے تحت ہر سال 3,500 پاکستانی ورکرز اٹلی جا سکیں گے جس میں 1500 سیزنل اور 2000 نان سیزنل ورکرز شامل ہوں گے۔
ترجمان وزارتِ سمندر پار پاکستانیز و ترقی انسانی وسائل کے مطابق اٹلی نے وفاقی وزیر چودھری سالک حسین کی خصوصی درخواست پر پاکستان کیلئے شپ بریکنگ، ہاسپٹیلیٹی، ہیلتھ کیئر اور زراعت کے شعبوں میں نوکریوں کا کوٹہ مختص کیا ہے۔
ترجمان نے بتایا کہ اٹلی میں پاکستانی ورکرز کیلئے ویلڈرز، ٹیکنیشن، شیف، ویٹرز، ہائوس کیپنگ، نرسنگ، میڈیکل ٹیکنیشن، فارمنگ اور کاشتکاری کے شعبوں میں روزگار کے مواقع موجود ہیں۔
جاری بیان میں وفاقی وزیر چودھری سالک حسین نے کہا کہ پاکستان اور اٹلی کے مابین جوائنٹ ورکنگ گروپ کا دوسرا اجلاس فروری 2026 میں اسلام آباد میں ہوگا۔
انہوں نے اٹلی کی جانب سے کوٹہ مختص کرنے کو اہم سنگ میل قرار دیتے ہوئے کہا کہ طویل محنت کے بعد پاکستانی ورک فورس کیلئے روزگار کے دروازے کھلنے جا رہے ہیں۔
انہوں نے کہا کہ یہ پیشرفت پاکستان کیلئے یورپین لیبر مارکیٹ میں نئے مواقع کی تلاش میں ایک اہم سنگ میل ہے۔
انہوں نے کہا کہ حکومت پاکستان اپنے محنت کشوں کو عالمی سطح پر باعزت روزگار فراہم کرنے کیلئے مسلسل کوشاں ہے، اوورسیز پاکستانیز ملکی معیشت میں ریڑھ کی ہڈی کا کردار ادا کر رہے ہیں، جلد ہی یورپ کے مزید ممالک بھی پاکستانی ورک فورس کیلئے کھلیں گے۔
