بالی ووڈ انڈسٹری کی مشہور اور یادگار فلم تھری ایڈیٹس کے سیکوئل کی تیاریاں جاری اور اس سے متعلق ایک دلچسپ پیشرفت سامنے آئی ہے جس کے مطابق فلمسازوں نے سیکوئل کیلئے عارضی طور پر فور ایڈیٹس کا ورکنگ ٹائٹل منتخب کر لیا ہے جس میں مستقبل میں تبدیلی بھی ممکن ہے۔
غیر ملکی میڈیا کے مطابق اسوقت سکرپٹ کو عارضی عنوان فور ایڈیٹس کے تحت تیار کیا جا رہا ہے اگرچہ یہ نام حتمی نہیں لیکن فلمساز اس مشہور فرنچائز کو اصل تین کرداروں سے آگے بڑھاتے ہوئے چوتھا مرکزی کردار متعارف کرانے کا ارادہ رکھتے ہیں، فلم کیلئے بڑے سپر سٹار کی تلاش جاری ہے جو چوتھا ایڈیٹ بن کر کہانی کا حصہ بنے گا، نئے کردار کو شامل کرنے کیلئے کہانی میں خاص اور مضبوط عناصر شامل کئے جا رہے ہیں تاکہ فلم پہلی قسط سے جڑی بھی رہے اور ناظرین کو کچھ نیا بھی پیش کرے، فلم کا سکرپٹ حتمی مراحل میں ہے جبکہ شوٹنگ کا آغاز 2026میں متوقع ہے۔
تھری ایڈیٹس کے سیکوئل کی ہدایتکاری ایک بار پھر راج کمار ہیرانی کرینگے جبکہ فلم کو ودھو ونود چوپڑا، راج کمار ہیرانی اور عامر خان مشترکہ طور پر پروڈیوس کرینگے، شائقین کیلئے خوشخبری یہ ہے کہ عامر خان، آر مادھون، شرمن جوشی اور کرینہ کپور خان کے اپنے اپنے یادگار کرداروں میں واپسی کی توقع کی جا رہی ہے۔
