گورنر سندھ کامران ٹیسوری نے پی ٹی آئی سے مذاکرات کی مخالفت کرتے ہوئے کہا ہے کہ پاکستان کی ترقی میں رکاوٹ بننے والوں سے مذاکرات نہیں کرنے چاہئیں، معرکہ معیشت کیلئے تیار ہیں، قومی ایئرلائن کی نجکاری کا عمل گیم چینجر ثابت ہوسکتا ہے۔
جمعرات کو یوم قائد پر گورنر سندھ نے مزار قائد پر حاضری دی، پھول چڑھائے اور فاتحہ خوانی کی۔
اس موقع پر میڈیا سے گفتگو کرتے ہوئے کامران ٹیسوری نے کہا کہ پاکستان خطے میں اہم ترین ملک، اسلام آباد طاقت کا مرکز بن گیا ہے، فیلڈ مارشل کی دوٹوک پالیسی نے پاکستان کو دنیا میں اہم مقام دلایا، بہترین عسکری حکمت عملی نے پاکستان کا اعتماد بحال کیا، اب پاکستان سعودی عرب میں محافظ کا کردار بھی ادا کررہا ہے۔
انہوں نے کہا کہ ہم معرکہ معیشت کیلئے تیار ہیں جیسے بھارت سے جنگ جیتی اسی طرح معیشت کی جنگ بھی جیت لیں گے۔
انہوں نے کہا کہ پاکستان نے افغانستان کے معاملے میں دوٹوک پالیسی اختیار کی اور دنیا کو بتا دیا کہ انتہا پسندی پر دوٹوک فیصلہ لے لیا ہے۔
انہوں نے کہا کہ دو دہائی بعد نجکاری کا عمل شفاف طریقے سے نظر آرہا ہے، قومی ایئرلائن کی نجکاری کا عمل گیم چینجر ثابت ہوسکتا ہے۔
گورنر سندھ نے پی ٹی آئی سے مذاکرات کی مخالفت کرتے ہوئے کہاکہ پاکستان کی ترقی میں رکاوٹ بننے والوںسے مذاکرات نہیں کرنے چاہئیں۔
