صدر مملکت آصف زرداری اور وزیراعظم شہباز شریف نے بانی پاکستان قائداعظم محمد علی جناح کو شاندار الفاظ میں خراج عقیدت پیش کرتے ہوئے کہا ہے کہ قائد اعظم کے اصول اتحاد، ایمان و نظم و ضبط ترقی و سماجی ہم آہنگی کیلئے ناگزیر ہیں، بانی پاکستان کی تعلیمات درخشاں قومی مستقبل کی ضمانت، آنیوالی نسلوں کیلئے مشعل راہ، رہنماء اصولوں پر چل کر ملک کو عظیم بنائیں گے۔
یوم ودلات قائداعظم پر جاری بیان میں صدر مملکت نے کہا کہ آج قائداعظم کو خراج عقیدت پیش کرنے کیساتھ یقین محکم اور انتھک محنت کو یاد کرنے کا دن ہے جس نے پاکستان کی تشکیل میں بنیادی کردار ادا کیا۔انہوں نے کہا کہ جب قوم مختلف چیلنجز سے نمٹ رہی ہے تو قائداعظم کی قیادت اور اصول آج بھی ہمارے لئے رہنمائی کا ذریعہ ہیں۔
انہوں نے کہا کہ قائداعظم جمہوریت، انصاف اور برابری کے علمبردار تھے ،یہی اقدار ہمارے قومی سفر کا مرکز ہیں۔
انہوں نے کہا کہ رہنماء اصول اتحاد، ایمان اور نظم و ضبط آج بھی ترقی، سماجی ہم آہنگی اور قومی اعتماد کے استحکام کیلئے ناگزیر ہے۔
صدر مملکت نے کہا کہ قوم آئندہ برس قائداعظم کے 150ویں یومِ پیدائش کی جانب بڑھ رہی ہے جو ایک اہم سنگ میل ہے۔
اس موقع پر ضروری ہے کہ قائداعظم کی زندگی اور جدوجہد پر سنجیدہ غور کیا جائے، ان کے وژن سے وابستگی کی تجدید کی جائے اور نظریات کو دیانت اور مقصدیت کے ساتھ آنے والی نسلوں تک منتقل کیا جائے۔
وزیراعظم شہباز شریف نے اپنے بیان میں کہا کہ ہر سال قائداعظم کا یوم پیدائش پوری قوم کیلئے تجدید عہد کا موقع فراہم کرتا ہے کہ ہم انفرادی اور بحیثیت مجموعی قومی سطح پر قائداعظم کے رہنماء سیاسی اصولوں، ریاستی فلاح و بہبود اور دائمی معاشرتی اصلاح کی تعلیمات پر موثر انداز میں عمل پیرا ہوں۔
وزیراعظم نے کہا کہ قائداعظم نے بلا تفریق رنگ و نسل، مذہبی ہم آہنگی، معاشرتی رواداری اور انصاف جیسے رہنما اصولوں کا درس دیا، آپ کے سنہری اصول ایمان، اتحاد، تنظیم نہ صرف درخشاں قومی مستقبل کی ضمانت بلکہ پاکستان کی آنے والی نسلوں کیلئے بھی مشعل راہ ہیں۔
انہوں نے کہا کہ قائداعظم وہ عظیم رہنماء اور عالمی لیڈر ہیں جن کی سیاسی بصیرت اور بے لوث قیادت نے قیام پاکستان اور مسلمانان برصغیر کے سیاسی مستقبل میں فیصلہ کن کردار ادا کیا، محمد علی جناح دھرتی کے وہ ناقابل فراموش سپوت ہیں جنہوں نے تاریخ کا دھارا موڑ کر مملکت خداداد کے قیام کو ممکن بنایا۔
وزیراعظم نے کہا کہ قائداعظم کے عزم و ہمت، پختہ ارادے اور پرخلوص جدوجہد نے بر صغیر کے لاکھوں مسلمانوں کیلئے نئی مملکت کے قیام کے خواب کو حقیقت میں بدل دیا۔ آپ نے نہ صرف خلوص نیت سے مسلمانوں کیلئے ایک آزاد، خود مختار ،فلاحی ریاست کے نیک عزم کیلئے بھرپور جدوجہد کی، بلکہ سیاسی مخالفین ،سامراجی قوتوں کو بھی شکست دی۔
وزیراعظم نے کہا کہ ہمیں اس عہد کی تجدید کرنا ہوگی کہ ہم قائداعظم کے نقش قدم پہ چلتے ہوئے قومی عزت، وقار، تحفظ اور ترقی و خوشحالی کیلئے مل کر خلوص نیت اور بے لوث لگن سے ہر شعبہ ہائے زندگی میں محنت کر کے ملک کو عظیم تر بنائیں گے۔
