عالمی شہرت یافتہ لیجنڈ فٹبال سٹار کرسٹیانو رونالڈو اور انکی ساتھی جارجینا روڈریگز نے سعودی عرب میں دو پرتعیش اور مہنگے ترین ولاز خرید لئے ہیں جس کی قیمت سن کر لوگوں کے ہوش اڑادیگی۔
غیر ملکی میڈیا رپورٹس کے مطابق پرتگال سے تعلق رکھنے والے کرسٹیانو رونالڈو اور ساتھی جارجینا روڈریگز نے پرتعیش ولاز نوجوما، رٹز کارلٹن ریزرو میں خرید لئے ہیں، یہ رہائشگاہیں ریڈ سی ریزیڈنسز کا حصہ ہیں جو نجی جزیروں پر قائم ہیں اور زمین سے تقریباً 26 کلومیٹر دور واقع ہیں جہاں صرف کشتی یا سمندری جہاز کے ذریعے ہی رسائی ممکن ہے، نوجوما میں مجموعی طور پر 19مکمل طور پر علیحدہ ولاز موجود ہیں جنہیں رازداری، سکون اور قدرتی ماحول سے قربت کو مدنظر رکھتے ہوئے ڈیزائن کیا گیا ہے۔
میڈیا رپورٹس کے مطابق رونالڈو نے اس مقام کو ہر لحاظ سے غیر معمولی قرار دیا اور کہا کہ پہلی ہی آمد پر انہیں اور جارجینا کو اس جزیرے کی فطری خوبصورتی سے خاص لگا محسوس ہوا۔
رپورٹس کے مطابق ریڈ سی انٹرنیشنل میں ایک ولا کی کم از کم قیمت 15.5 ملین سعودی ریال(تقریباً ایک ارب 15 کروڑ روپے)سے زائد ہے تاہم یہ واضح نہیں کہ رونالڈو نے دونوں ولاز کی کتنی قیمت ادا کی ہے۔
ریڈ سی انٹرنیشنل کے سی ای او جان پیگانو کے مطابق رونالڈو کی خریداری اس مقام کی منفرد کشش کی عکاس ہے، جہاں لگژری، فطرت اور پائیداری کا حسین امتزاج پیش کیا گیا ہے، منصوبہ 2040تک مثبت ماحولیاتی اثرات کے ہدف کے تحت مکمل طور پر قابل تجدید توانائی پر مبنی ہے جبکہ یہ مقام مشہور شخصیات اور نجی چھٹیاں گزارنے کے خواہشمند افراد کیلئے مثالی انتخاب سمجھا جا رہا ہے۔
