لاہور ہائیکورٹ نے سموگ تدارک کیلئے پولیس گاڑیوں سمیت تمام ہیوی گاڑیوں کی چیکنگ کا حکم دے دیا جبکہ پی ایچ اے کو درختوں کی منتقلی کیلئے جامع پالیسی مرتب کرنے کی ہدایت کردی۔
بدھ کو لاہور ہائیکورٹ نے سموگ تدارک بارے درخواستوں پرگزشتہ سماعت کا تحریری حکم جاری کر دیا۔
جسٹس شاہد کریم نے جانب سے جاری تحریری حکم میں ہدایت کی گئی ہے کہ پولیس اور دیگر سرکاری و نجی ہیوی گاڑیوں کی چیکنگ کر کے فٹنس سے متعلق رپورٹ محکمہ ماحولیات کو پیش کی جائے۔
عدالتی حکم میں کہا گیا ہے کہ شوگر ملز میں ٹریٹمنٹ پلانٹس کی اپ ڈیٹ تفصیل رپورٹ میں شامل کی جائے ،بتایا جائے کہ آیا 6 شوگر ملز نے واٹر ٹریٹمنٹ پلانٹس نصب کرلئے ہیں یا نہیں، عدالت نے واسا کو ہدایت کی کہ پانی کے چارجز کیلئے متعلقہ رولز کے تحت نوٹسز جاری کئے جائیں۔
عدالت نے ناصر باغ میں جاری تعمیراتی کام کے دوران کسی بھی درخت کو کاٹنے سے روکتے ہوئے کہا ہے کہ عدالت کو پی ایچ اے کی جانب سے آگاہ کیا گیا ہے کہ باغ سے 123درخت ٹرانسپلانٹ کئے گئے ہیں جو محفوظ اور مکمل دیکھ بھال میں ہیں، عدالت نے پی ایچ اے کو درختوں کی منتقلی بارے جامع پالیسی مرتب کرنے کی ہدایت بھی دی۔
عدالت نے ای پی اے وکیل سے سموگ تدارک بارے تفصیلی رپورٹ طلب کرتے ہوئے مزید سماعت 12 دسمبر تک ملتوی کر دی۔
