وزیر ٹرانسپورٹ سندھ شرجیل میمن نے کراچی و حیدر آباد کی ہر بڑی سڑک پر پبلک ٹرانسپورٹ چلانے کا اعلان کرتے ہوئے کہا ہے کہ اگلے ماہ کراچی میں نئی بسوں کا فلیٹ لا رہے ہیں، وزیراعلی سے مزید500ای وی بسوں کی منظوری لے لی ہے۔
سندھ اسمبلی میں اظہار خیال کرتے ہوئے شرجیل میمن نے کہا کہ کراچی کے عوام کو بہتر ٹرانسپورٹ سہولیات کی فراہمی ہمارا عزم ہے، ہمیں ٹریفک کا نظام ٹھیک کرنا، حادثات روکنے کیلئے کیس ٹو کیس جائزہ لینا ہوگا، اپوزیشن کو دعوت دیتے ہیں کہ ہمیں اس حوالے سے مشورے دے۔
انہوں نے کہا کہ کراچی اور حیدر آباد کی ہر بڑی روڈ پر پیپلز بس سروس چلائینگے، ووٹر چاہے جس کا بھی ہو ہر علاقے میں بہترین ٹرانسپورٹ سروس ہونی چاہئے، انٹرا سٹی بسیں چلانے کیلئے ٹرانسپورٹرز کو قرضے دینے کیلئے تیار ہیں۔
انہوں نے بتایا کہ اگلے ماہ نئی بسوں کا فلیٹ لا رہے ہیں، 50ای وی اور ڈبل ڈیکر بسیں کراچی پورٹ پر پہنچ چکی ہیں، وزیراعلی سے مزید500ای وی بسیں لانے کی منظوری لے لی ہے۔
