27ویں آئینی ترمیم کے تحت سی جے سی ایس سی کا عہدہ ختم ہونے کے بعد ملکی تاریخ کے آخری چیئرمین جوائنٹ چیفس آف سٹاف کمیٹی جنرل ساحر شمشاد مرزا 3 سال عہدے پر رہنے کے بعد سبکدوش ہوگئے ہیں۔
جنرل ساحر شمشاد مرزا نے پاک فوج میں 40 سالہ شاندار عسکری خدمات مکمل کیں۔
جوائنٹ چیفس آف سٹاف کمیٹی اِنٹر سروسز فورم تھا جو تینوں مسلح افواج کے درمیان تعاون اور ہم آہنگی کیلئے کام کرتا تھا۔
پارلیمنٹ کی جانب سے منظور کردہ 27ویں آئینی ترمیم کے نتیجے میں چیئرمین جوائنٹ چیفس آف اسٹاف کمیٹی کا عہدہ ختم کردیا گیا جبکہ آرمی چیف اب چیف آف ڈیفنس فورسز بھی ہونگے۔
جنرل ساحر شمشاد مرزا نے اپنے اعزاز میں جوائنٹ سٹاف ہیڈ کوارٹر میں منعقد کی گئی الوادعی تقریب سے خطاب کے دوران کہا کہ ہمارے ارد گرد کی دنیا ایک ناقابل تصور رفتار سے تبدیل ہو رہی ہے اس تبدیلی سے ہماری اندرونی اور بیرونی آزمائشوں پر گہرے اثرات مرتب ہو رہے ہیں، یہ اثرات ہائبرڈ محاذ آرائی سے لیکر جنگ تک محیط ہیں، ان حالات میں ہماری مسلح افواج کو زیادہ ہم آہنگی، مشترکہ تعاون اور یکسوئی کیساتھ تیار رہنا ہوگا۔
انکا کہنا تھا کہ مسلح افواج کے درمیان ہم آہنگی، مشترکہ حکمت عملی اور تعاون کو اہم ضرورت سمجھتا ہوں ناکہ ایک خواہش۔
