اقوام متحدہ میں پاکستان کے نائب مستقل مندوب عثمان جدون نے اپنے خطاب میں کہا ہے کہ انسانی سمگلنگ دنیا بھر کے معاشروں اور افراد کو متاثر کر رہی ہے، مسلح تنازعات، ماحولیاتی آفات اور معاشی عدم مساوات اس مسئلے کو مزید بڑھا رہے ہیں۔
اقوام متحدہ کی جنرل اسمبلی میں انسانی سمگلنگ کی روک تھام کیلئے قرارداد کی منظوری کے موقع پر خطاب کرتے ہوئے انہوں نے کہاکہ پاکستان بیک وقت افراد کی نقل و حرکت کیلئے ذریعہ روانگی، گزرگاہ اور میزبان ملک تینوں حیثیتیں رکھتا ہے اسلئے پاکستان کے لئے یہ مسئلہ غیر معمولی اہمیت رکھتا ہے۔
ہم اس مسئلے کے بنیادی اسباب کو روکنے، خاص طور پر معاشی ناہمواری، قانونی و محفوظ ہجرت کے محدود راستے اور تنازعات کے حل و تدارک کے اقدامات کی ضرورت پر زور دیتے ہیں۔
غیرملکی میڈیاکے مطابق 193 رکنی جنرل اسمبلی کی طرف سے منظور کردہ پولیٹیکل ڈیکلریشن برائے نفاذ گلوبل پلان آف ایکشن ٹو کمبیٹ ٹریفیکنگ ان پرسنز 2025 کے عنوان سے قرارداد میں انسانی سمگلنگ کی شدید مذمت کرتے ہوئے کہا گیا ہے کہ یہ جرم نہ صرف سنگین نوعیت کا ہے بلکہ انسانی وقار پر شدید حملہ بھی ہے۔
جنرل اسمبلی نے اس عزم کا اظہار کیا ہے کہ انسانی سمگلنگ کی بنیادی وجوہات کیخلاف خاص طور پر خواتین اور بچوں کے حوالے سے کوششیں تیز کی جائیں گی۔
