بیجنگ(شِنہوا)چین کے خلائی ادارے نے اگلے دو سالوں میں تجارتی خلائی کمپنیوں کی اعانت اور انہیں بین الاقوامی تعاون کی ترغیب دینے کے لئے ایک عملی منصوبہ پیش کیا ہے۔
چین کی قومی خلائی انتظامیہ (سی این ایس اے) کی جانب سے جاری کردہ دستاویز میں ملک کی کمرشل خلائی کمپنیوں کو "عالمی سطح پر قدم رکھنے” کی دعوت دی گئی ہے اور ترقی پذیر ممالک کو سیٹلائٹ ایپلیکیشنز کے شعبے کی ترقی میں مدد فراہم کرنے کی ہدایت کی گئی ہے۔
سی این ایس اے نے یقین دہانی کرائی ہے کہ تجارتی خلائی منصوبوں کو چین کے بین الاقوامی تعاون کے ایجنڈے میں شامل کیا جائے گا۔
ادارے نے عزم ظاہر کیا ہے کہ وہ ملکی نیٹ ورک کے تجارتی استعمال کو وسعت دے گا، جس میں شہری ٹریکنگ، ٹیلی میٹری اور کنٹرول (ٹی ٹی اینڈ سی) سٹیشنز، ڈیٹا وصول کرنے والی سائٹس، درستگی جانچنے اور تصدیقی شعبے شامل ہیں، نیز بڑے تجرباتی اثاثے جیسے راکٹ انجن ٹیسٹ سٹینڈز اور خلائی ماحول کی نقل و سیمولیشن کی سہولیات بھی شامل ہیں۔
تجارتی اداروں کو کھلے مقابلے کے ذریعے منتخب کیا جائے گا تاکہ وہ جدید اور کلیدی خلائی پروگراموں میں حصہ لے سکیں، جن میں جدید پروپولشن، اگلی نسل کے سیٹلائٹ پلیٹ فارمز اور پے لوڈز، ساتھ ہی مربوط مواصلات، نیوی گیشن اور ریموٹ سینسنگ ایپلیکیشنز شامل ہیں۔
سی این ایس اے ایک قومی تجارتی خلائی ترقیاتی فنڈ قائم کرے گا اور سرکاری خریداری کو وسیع کرے گا تاکہ تجارتی صلاحیتیں جیسے خلائی گاڑیاں، سیٹلائٹس، راکٹ یا سیٹلائٹ بھیجنے کے مراکز اور ٹی ٹی اینڈ سی سہولیات قومی مشنز میں شامل کی جا سکیں۔
منصوبے کے تحت مقامی حکومتوں سے کہا گیا ہے کہ وہ دوبارہ استعمال ہونے والے راکٹ اور سمارٹ سیٹلائٹس پر مرکوز ٹیکنالوجی-انوویشن سنٹر قائم کریں اور جدید پیداوار، آخری اسمبلی اور جانچ کے لئے اوپن پلیٹ فارم تیار کریں۔
تجارتی کمپنیوں کو خلائی وسائل کے استعمال، مدار میں خدمات، ملبے کی صفائی، خلائی سیاحت اور خلا میں حیاتیاتی پیداوار کے شعبوں میں پیش قدمی کی ترغیب دی گئی ہے۔
اس منصوبے کا مقصد 2027 تک تجارتی خلائی شعبے کی اعلیٰ معیار کی ترقی حاصل کرنا ہے۔ ملک کے 15 ویں پانچ سالہ منصوبے (2026-2030) کے لئے دی گئی سفارشات میں خلائی شعبے کو تزویراتی ابھرتی ہوئی صنعتوں میں شامل کیا گیا ہے۔
