پاکستان اور ایران نے علاقائی امن و استحکام، تعلقات کو مزید فروغ دینے کے عزم کا اعادہ کیا ہے۔
آئی آیس پی آر کے مطابق ایران کی سپریم نیشنل سیکیورٹی کونسل کے سیکرٹری علی لاریجانی نے بدھ کو جی ایچ کیو راولپنڈی کا دورہ کیا اور فیلڈ مارشل سید عاصم منیر سے ملاقات کی جس میں دوطرفہ تعاون، علاقائی سیکیورٹی امور اور پاکستان ایران تعلقات کو مزید مضبوط بنانے کی اہمیت پر تبادلہ خیال کیا گیا۔
ترجمان کے مطابق فیلڈ مارشل نے علاقائی امن و استحکام کیلئے پاکستان کے عزم کا اعادہ کیا اور دہشت گردی کے خاتمے کیلئے ایران سے قریبی تعاون کی ضرورت پر زور دیا۔
آئی ایس پی آر کے مطابق فیلڈ مارشل نے بدلتی جیو سٹریٹجک صورتحال کے تناظر میں سٹریٹجک تعاون کی بڑھتی اہمیت اجاگر کی۔
اس موقع پر ایرانی سپریم نیشنل سیکیورٹی کونسل کے سیکرٹری علی لاریجانی نے خطے میں امن و استحکام کیلئے پاکستان کے کلیدی کردار کو سراہا اور پاک ایران تعلقات کو مزید فروغ دینے کے عزم کا اظہار کیا۔
علی لاریجانی نے پاکستان ایران مکالمے اور شراکت داری کی اہمیت پر زور دیتے ہوئے کہا کہ باہمی تعاون علاقائی چیلنجز سے نمٹنے، دیرپا استحکام کیلئے ضروری ہے۔
