وفاقی وزیر امور کشمیر انجینئر امیر مقام نے کہا ہے کہ عوامی خدمت مسلم لیگ (ن) کا ایجنڈا ہے، مخالفین تعصب کی عینک اتار کر دیکھیں (ن)لیگ کے کام نظر آئیں گے، خواہش ہے گلگت بلتستان کے ہر علاقے میں ترقی ہو۔
مسلم لیگ (ن) سیکرٹریٹ گلگت بلتستان میں کارکنان سے خطاب کرتے ہوئے انجینئر امیر مقام نے کہا کہ خیبرپختونخوا پی ٹی آئی کا گڑھ ہے مگر ضمنی الیکشن میں ہری پور کی عوام مسلم لیگ (ن) کو ووٹ دیکر واقعی تبدیلی لائے ہیں، ضمنی الیکشن میں پارٹی نے ہر جگہ کلین سویپ کیا۔
انہوں نے کہا کہ پی ٹی آئی امیداوار 40ہزار ووٹوں کے فرق سے ہارا، خیبرپختونخوا کے عوام کی جتنی تعریف کریں اتنی کم ہے، جی بی اور آزاد کشمیر کے عوام ہمیشہ پاکستان کے محافظ رہے ہیں۔
انہوں نے کہا کہ لیگی قائد نواز شریف، وزیراعظم شہباز شریف اور وزیراعلی مریم نواز کا ایک ایجنڈا عوام کیلئے کام کرنا ہے، پارٹی کو جب موقع ملا انہوں نے عملی طور پر ثابت کر دکھایا، مخالفین تعصب کی عینک اتار کر دیکھیں (ن) لیگ کے کام نظر آئیں گے۔
وفاقی وزیر نے کہا کہ گزشتہ حکومت نے وقت ضائع کرنے کے علاوہ یہاں کچھ نہیں کیا، ہماری خواہش ہے گلگت بلتستان کے بھی ہر ٹائون میں ترقی ہو۔
