راولپنڈی میں ٹریفک قوانین کی خلاف ورزیوں پر ای چالان سسٹم فعال کردیا گیا۔
پولیس ترجمان کے مطابق ای چالاننگ سسٹم کو سیف سٹی کمانڈ اینڈ کنٹرول سینٹر سے منسلک کیا گیا ہے ،ٹریفک قوانین کی خلاف ورزی پر خودکار سی سی ٹی وی کیمروں سے تصاویر اور کوڈ کے ساتھ ای چالان گاڑی کے مالک کو موصول ہوگا اور جرمانہ مقررہ وقت پر جمع کرانا لازم ہوگا۔
ترجمان کے مطابق ٹریفک سگنل کی خلاف ورزی ،بغیر ہیلمٹ موٹر سائیکل، لین وائلیشن، دوران ڈرائیونگ موبائل فون کے استعمال پر بھی فوری ای چالان جاری ہوگا، اسی طرح غیرنمونہ اور غیرقانونی نمبر پلیٹ پر بھی خودکار کارروائی کی جائے گی، خلاف ورزی ریکارڈ ہوتے ہی چالان جاری ہو کر گھر کے پتے پر بھیج دیا جائے گا۔
راولپنڈی میں سیف سٹی کے تحت 359 مقامات پر 2ہزار سے زائد کیمرے نصب ہیں جبکہ داخلی و خارجی راستوں پر 15کیمرے لگائے گئے ہیں۔
ترجمان کے مطابق سیف سٹی کیمروں کے ذریعے عوامی مقامات کی مانیٹرنگ موثر انداز میں کی جارہی ہے ،ٹریفک مینجمنٹ، ٹریفک پولیس کی کارکردگی اور اہم سڑکوں کی نگرانی بھی نظام کا حصہ ہے۔
