یوکرین اور فرانس نے دفاعی تعاون کو مزید فروغ دینے اور تکنیکی اشتراک بڑھانے پر اتفاق کرتے ہوئے ایک دفاعی معاہدہ پر بھی دستخط کئے ہیں جس کے مطابق یوکرین دس سال کیلئے فرانس سے 100 رافیل جنگی طیارے خریدے گا، معاہدہ پر یوکرینی صدر ولادیمیر زیلنسکی اور اس کے فرانسیسی ہم منصب ایمانوئل میکرون نے دستخط کردئیے ہیں۔
غیر ملکی میڈیا کے مطابق ایسے موقع پر جب حالیہ ہفتوں میں روس نے یوکرین پر ڈرون اور میزائل حملوں میں اضافہ کیا ہے، زیلنسکی اس وقت پیرس کے دورے پر ہیں۔
معاہدہ پر دستخط کی تقریب کے بعد زیلنسکی نے صحافیوں سے گفتگو میں کہا کہ یہ دنیا کا سب سے بہترین فضائی دفاعی معاہدہ ہوگا۔
ادھر فرانسیسی صدارتی محل ایلیزے نے تصدیق کرتے ہوئے کہا ہے کہ معاہدہ میں رافیل کے علاوہ فضائی دفاعی نظام، بم اور ڈرون بھی شامل ہیں اور یہ تمام سامان داسوٹ کی جانب سے نیا تیار کردہ ہوگا، یعنی فرانس اپنے ذخائر سے کچھ منتقل نہیں کریگا۔
فرانسیسی صدر میکرون نے کہا ہے کہ ہم نے 100 رافیل طیاروں کی منصوبہ بندی کی ہے یہ ایک بہت بڑی تعداد ہے، یوکرینی فوج کی دوبارہ تشکیل کیلئے یہی ضروری ہے، یہ ڈیل فرانس اور ڈسالٹ کیلئے بھی مثبت پیشرفت ہے۔
غیر ملکی میڈیاکی رپورٹ کے مطابق فرانس آئندہ دو برسوں میں مرحلہ وار طیاروں کی ترسیل کا آغاز کریگا۔
