وفاقی وزیر داخلہ نے کہا ہے کہ ملک کی بدنامی کا باعث بننے والے کسی مسافر کو سفر کی اجازت ہرگز نہیں دی جائیگی، ایف آئی اے یا کسی بھی ادارے کے ملوث اہلکاروں کیخلاف سخت ایکشن لیا جائیگا۔
انہوں نے لاہور ایئرپورٹ کے امیگریشن عملے کو ضروری دستاویزات کے بغیر کسی بھی مسافر کو سفر کی اجازت ہرگز نہ دینے کا حکم جاری کرتے ہوئے کہاہے کہ غیر قانونی امیگریشن کسی صورت برداشت نہیں کی جائیگی۔
یہ احکامات وزیر داخلہ محسن نقوی نے وزیر اوورسیز پاکستانیز چوہدری سالک حسین کے ہمراہ لاہور ائرپورٹ کے اچانک دورے کے دوران دیں، وزراء 2 گھنٹے تک ائرپورٹ پر موجود رہے اور امیگریشن کے عمل کا مشاہدہ کیا۔
وزیر داخلہ نے امیگریشن کاونٹرز پر لوگوں کے رش پر ناراضگی کا اظہار کرتے ہوئے عملے کو امیگریشن کا عمل جلد نمٹانے کے احکامات دیئے۔
اس موقع پروفاقی وزراء نے بیرون ممالک جانیوالے مسافروں سے بات چیت کی اوران سے امیگریشن کے عمل کے بارے میں بھی پوچھا۔
چوہدری سالک حسین نے سفری دستاویزات پر پروٹیکر سٹیکرز چیک کئے جس کے تحت ڈرائیور کی ملازمت کیلئے بیرون ملک جانیوالے نوجوان کو ڈرائیونگ لائسنس نہ ہونے پر سفر سے روک دیا گیا، انہوں نے اظہار برہمی کرتے ہوئے انکوائری کا حکم بھی دیا۔
ذرائع کے مطابق ایف آئی اے اہلکار کی مبینہ ملی بھگت سے بیرون ملک جانیوالے مسافر کو امیگریشن عملے نے کاونٹر پر روک لیا اور آف لوڈ مسافر کو نجی کمپنی کو ادا رقم واپس دلانے کی یقین دہانی بھی کرائی گئی۔
وزیرداخلہ نے نوجوانوں کو روکنے والے امیگریشن اہلکاروں کو شاباش دی، اپنی جیب سے انعام دیا اور تعریفی سرٹیفکیٹس بھی دینے کا اعلان کیا۔
چوہدری سالک حسین نے عملے کو ہدایت کی کہ پروٹیکر کے تحت مسافروں کی متعلقہ ملازمت کی مستند دستاویزات کی تصدیق ہر صورت کی جائے۔
