رواں سال تھائی لینڈ میں مس یونیورس مقابلے میں پاکستان کی نمائندگی کرنے والی روما ریاض نے کہا ہے مجھے فخر ہے کہ پاکستانی ہوں، میری جلد اسی رنگ کی ہے جس رنگ کی پاکستان کی مٹی ہے، اسی رنگ کی عورتوں نے ہمارے خاندان، ہمارے گھر بنائے اور اپنے دلوں میں اس وطن کو بسایا۔
اپنی رنگت پر ہونے والی تنقید کے حوالے سے رومار یاض نے اپنے آفیشل انسٹاگرام اکاؤنٹ پر ایک ویڈیو جاری کی جس میں خوبصورت اور پرعزم انداز میں جواب دیتے ہوئے روما ریاض نے کہا کہ ہر وہ پاکستانی خاتون جو کبھی یہ سن چکی ہے کہ وہ بہت سانولی ہے، بہت نڈر ہے یا بہت مختلف ہے تو آپ بھی پاکستان کا چہرہ ہیں، ہمیں رنگت کے فرق نے یہ سکھایا ہے کہ گوری رنگت کو خوبصورتی سمجھو اور اپنی جڑوں کو بھول جا، مگر میں اس نئی نسل کی نمائندگی کرتی ہوں جو جنوبی ایشیائی عورت کیلئے بنائے گئے تنگ نظری کے نظریہ قبول نہیں کرتی۔
انہوں نے کہا کہ اپنی جڑوں میں، اپنی اقدار میں اور اپنی جلد کے ہر شیڈ میں، خوبصورتی کو کسی ایک رنگ یا ظاہری معیار تک محدود نہیں کیا جا سکتا، خوبصورتی کسی خاص رنگ یا چہرے کے خدوخال سے وابستہ نہیں، یہ احساس اور شناخت کا نام ہے۔
