عدالت نے لاپتہ افراد بازیابی کیس میں حکومت و سیکیورٹی اداروں کو نوٹس جاری کرتے ہوئے 4 ہفتوں میں جواب طلب کر لیا۔
پیر کو سندھ ہائیکورٹ میں قائم مقام چیف جسٹس سندھ ہائیکورٹ جسٹس ظفر احمد راجپوت نے لاپتہ افراد بازیابی بارے درخواستوں پر سماعت کی۔
درخواست گزار کے وکیل نے عدالت کو بتایا کہ سعد عالم فیروز آباد تھانے کی حدود میں بال کٹوانے گیا تھا اور واپس گھر نہیں پہنچا، شہری کے سسر نے گمشدگی کی درخواست پولیس میں جمع کرائی تھی لیکن تاحال کوئی سراغ نہیں ملا۔
عدالت نے استفسار کیا کہ کیا شہری سسرال سے ناراض ہو کر تو کہیں چلا نہیں گیا؟ وکیل نے مو قف اپنایا وہ گھر سے صرف بال کٹوانے کیلئے نکلا تھا اس کے بعد فون مسلسل بند ہے، کوئی رابطہ نہیں ہو پایا، اسی طرح ایک اور کیس میں وکیل نے بتایا کہ شہری عبدالصبغت تین سال بعد جیل سے ضمانت پر رہا ہوا تھا جو سہراب گوٹھ کے علاقے سے لاپتا ہوگیا ہے۔
عدالت نے حکومت و سیکیورٹی اداروں سمیت دیگر فریقین کو لاپتہ افراد کی تلاش و پیشرفت رپورٹ چار ہفتوں میں پیش کرنے کا حکم دیتے ہوئے سماعت ملتوی کر دی۔
