سابق وزیراعظم چودھری شجاعت حسین نے کہا ہے کہ جرمنی کی ٹیکنالوجی شاندار ہے، پاکستان کو اس سے استفادہ کرنا چاہئے، پاکستان اور جرمنی کو دوطرفہ تجارت بڑھانے کی ضرورت ہے، دونوں ملکوں کے سرمایہ کار مشترکہ منصوبے شروع کرنے کا جائزہ لیں۔
ان خیالات کا اظہار انہوں نے جرمن سفیر اینا لیپل سے ملاقات کے دوران گفتگو کرتے ہوئے کیا، ملاقات میں دوطرفہ تجارت کیلئے عملی اقدامات پر زور دیا گیا، اس موقع پر باہمی دلچسپی کے امور اور دوطرفہ تجارت پر بھی بات چیت ہوئی۔
جرمنی کی سفیر اینا لیپل نے چودھری شجاعت حسین کی خیریت دریافت کی، پاکستان اور جرمنی کے سرمایہ کاروں کے مابین جوائنٹ وینچرز کے امکانات کا جائزہ لیا گیا۔
جرمن سفیر نے کہا کہ سکل ڈویلپمنٹ کی بہتری اور پنک سالٹ کی ویلیو ایڈیشن کیلئے جرمن ٹیکنالوجی سے استفادہ کیا جاسکتا ہے۔
صوبائی وزیر صنعت و تجارت پنجاب چودھری شافع حسین نے پنجاب کے مختلف شعبوں میں سرمایہ کاری کے مواقع سے آگاہ کیا اور کہا کہ پنجاب کے سپیشل اکنامک زونز میں غیر ملکی سرمایہ کاری کے وسیع مواقع موجود ہیں، سپیشل اکنامک زونز میں عالمی معیار کا صنعتی انفراسٹرکچر موجود ہے، یہاں سرمایہ کاری پر غیر ملکی سرمایہ کاروں کو خصوصی مراعات حاصل ہیں، فیڈمک کے زیر اہتمام انڈسٹریل اسٹیٹس میں غیر ملکی سرمایہ کاروں کیلئے کمیونٹی سینٹر بنایا جارہا ہے۔
وفاقی وزیر چودھری سالک حسین نے کہاکہ بیرون ممالک ہنر مند افرادی قوت کی بہت ڈیمانڈ ہے، فیڈمک کے زیر اہتمام انڈسٹریل اسٹیٹس میں بڑے غیر ملکی سرمایہ کار گروپوں نے سرمایہ کاری کر رکھی ہے، جرمنی کے سرمایہ کار بھی پاکستان میں سرمایہ کاری کر سکتے ہیں۔
جرمن سفیر نے کہا کہ جرمنی کا سکل ڈویلپمنٹ میں پاکستان بالخصوص پنجاب کیساتھ اشتراک موجود ہے، جرمنی کے سرمایہ کاروں کو پاکستان میں سرمایہ کاری کے مواقع سے آگاہ کیا جائیگا، پنجاب کیساتھ مختلف شعبوں میں تعاون بڑھایا جائے گا۔
