صدرِ مملکت آصف علی زرداری نے علامہ محمد اقبال کو خراج عقیدت پیش کرتے ہوئے کہا ہے کہ انہوں نے امت مسلمہ کی شناخت، روحانیت اور آزادی پر زور دیا، انکے نظریات نے پاکستان کی قومی شناخت کی تشکیل کی، ہم اقبال کے اصولوں پر عمل پیرا رہنے کے عزم کی تجدید کرتے ہیں جبکہ وزیر اعظم شہباز شریف نے کہا کہ علامہ اقبال نے غلامی کے اندھیروں میں روشنی کی شمع جلائی، انہوں نے مایوسی کا شکار قوم کو خودی کا پیغام دیا اور سبق دیا کہ ایمان اور علم و عمل کی بنیاد پر زندہ قوم اپنی تعمیر کرتی ہے۔
شاعر مشرق علامہ محمد اقبال کے 148 ویں یومِ پیدائش پرصدرِ مملکت نے اپنے پیغام میں کہا کہ علامہ محمد اقبال نے برصغیر کے مسلمانوں میں آزادی کا شعور بیدار کیا، انکا پیغام آج بھی رہنمائی کا سرچشمہ ہے، 1930 کا خطبہ الہ آباد مسلمانوں کی خودمختاری کی بنیاد بنا۔
صدر زرداری نے کہا کہ پاکستان کو خوشحال، پرامن اور متحد بنانے کیلئے ہم سب کو کردار ادا کرنا ہوگا، علامہ اقبال کا وژن آج بھی ہماری ترقی کی سمت متعین کرتا ہے، انکا فکری ورثہ آنیوالی نسلوں کیلئے مشعلِ راہ رہے گا۔
وزیر اعظم نے کہا آج ہم شاعر مشرق، مفکر اسلام علامہ محمد اقبال کو انکے یوم پیدائش پر خراج عقیدت پیش کرتے ہیں، آج بھی قومی اور عالمی حالات میں فکر اقبال رہنمائی فراہم کرتی ہے، اقبال کا خواب تھا کہ نوجوان اپنی تقدیر خود لکھیں اور اپنی پرواز سے نئی دنیا پیدا کریں۔
وزیر اعظم نے کہا کہ اسی فکر کے تحت حکومت نے اڑان پاکستان جیسے متعدد پروگرام شروع کئے، عالم اسلام کا اتحاد اور دنیا میں قیام امن مفکر اسلام اقبال کا خواب تھا، اقبال امت مسلمہ کو ایک جسم کی مانند دیکھتے تھے۔
