وزیراعلیٰ پنجاب مریم نواز شریف نے کہا ہے کہ علامہ اقبال نے اپنی شاعری کے ذریعے نوجوانوں کیلئے فکر انگیز پیغام دیا، قوم کیلئے خودداری کا درس علامہ اقبال کا بہت بڑا احسان ہے، اقبال کے فکر و فلسفہ کی حقیقی تعبیر سے ہی پاکستان سیاسی، معاشی، مذہبی اور معاشرتی لحاظ سے دنیا میں ممتاز مقام حاصل کریگا۔
انہوں نے کہا کہ اقبال کے افکار پر عمل سے پاکستان فلاحی ریاست بن سکتا ہے۔
شاعر مشرق، مصور پاکستان علامہ محمد اقبال کے یوم پیدائش پر اپنے خصوصی پیغام میں انکا کہنا تھا کہ علامہ اقبال شاعر ہی نہیں بلکہ مصلح اور رہبر تھے، انہوں نے اپنی شاعری سے برصغیر کے مسلمانوں کو آزادی کا شعور دیا، علامہ اقبال نے قوم کی سمت متعین کی۔
انکا کہنا تھا کہ علامہ محمد اقبال نے اپنی فکر انگیز شاعری کے ذریعے خودداری، اعلی اقدار، انصاف پسندی، صاف گوئی اور جمہوریت کا درس دیا، علامہ اقبال اسلام کے آفاقی پیغام کے علمبردار ہیں جو ہر زمانے کیلئے زندہ و پائندہ ہے، شاعر مشرق کے تصور پاکستان کو سمجھنے کی اشد ضرورت ہے۔
انکا مزید کہنا تھا کہ علامہ اقبال کے افکار پر عمل پیرا ہو کر آزادانہ، منصفانہ اور عادلانہ معاشی و سماجی نظام قائم کرنا وقت کی ضرورت ہے۔
آج کے دن ہمیں بحیثیت قوم علامہ اقبال کے افکار کو مشعل راہ بنانے کے عزم کا اعادہ کرنا ہے۔
