پاکستان اور چین نے دوطرفہ تعلقات مزید مضبوط بنانے کا عزم اور علاقائی و عالمی فورمز پر قریبی تعاون جاری رکھنے پر اتفاق کیا ہے۔
ذرائع کے مطابق دوحہ میں جاری سماجی ترقی بارے دوسری عالمی کانفرنس کے موقع پر صدر آصف زرداری اور چینی نائب صدر ہان ژنگ کے درمیان ملاقات ہوئی۔
دونوں رہنمائوں نے باہمی اعتماد، احترام اور علاقائی خوشحالی کے وژن پر مبنی تعلقات مزید مضبوط بنانے کے عزم کا اعادہ کرتے ہوئے علاقائی و عالمی فورمز پر قریبی تعاون جاری رکھنے پر اتفاق کیا۔
صدر مملکت آصف زرداری نے کہا کہ پاکستان اور چین آہنی بھائی اور ہر موسم کے سٹریٹجک شراکت دار ہیں مشکل کی ہر گھڑی میں ساتھ دینے پر چینی قیادت کے شکر گزار ہیں۔
انہوں نے کہا کہ چین سے دوستی پاکستان کی خارجہ پالیسی کا اہم ستون ہے۔ صدر نے سی پیک کے کامیاب نفاذ میں چین کے تعاون کو سراہتے ہوئے کہا کہ سی پیک کا دوسرا مرحلہ اعلی معیار کی ترقی کے نئے دور میں داخل ہو چکا ہے۔
اس موقع پر چینی نائب صدر ہان ژنگ نے صدر شی جن پھنگ کی جانب سے نیک تمنائیں پہنچائیں اور پاکستان کی دہشت گردی کے خلاف کوششوں اور علاقائی امن کیلئے کردار کو سراہا۔
چینی نائب صدر نے کہا کہ چین سی پیک کے دوسرے مرحلے میں پاکستان کی ترقی میں تعاون جاری رکھے گا جس کے منصوبوں میں ٹرانسپورٹ، انفراسٹرکچر، آئی ٹی، زراعت اور ووکیشنل تربیت جیسے شعبے شامل ہیں
