لاہور: وزیراعلی پنجاب مریم نواز نے کہا ہے کہ مضبوط جمہوری معاشرے کیلئے آزاد صحافت ناگزیر ہے، حق سچ کی آواز اٹھانے والے صحافیوں پر ظلم و تشدد بند ہونا چاہئے، بحیثیت وزیر اعلی آزادی صحافت کے تحفظ کی ضامن ہوں، پنجاب میں صحافی و صحافت محفوظ ہے۔
صحافیوں کیخلاف جرائم کے خاتمے کے عالمی دن پر وزیر اعلی مریم نواز نے اپنے بیان میں کہا کہ احساس ذمہ داری کیساتھ آزادی صحافت جمہوریت کی اساس ہے، مضبوط جمہوری معاشرے کیلئے صحافت کا آزاد ہونا بہت ضروری ہے۔
انہوں نے کہا کہ صحافی معاشرتی انصاف کے محافظ اور عوام کی آواز ہیں، ظلم، ناانصافی اور جھوٹ کو بے نقاب کرنے والے صحافی ہیرو ہیں، بحیثیت وزیر اعلی آزادی صحافت کے تحفظ کی ضامن ہوں۔
انہوں نے کہا کہ حق سچ کی آواز اٹھانے والے صحافیوں پر ظلم و تشدد بند ہونا چاہئے، صحافیوں کے حقوق کے تحفظ کیلئے حکومت متعدد اقدامات کر رہی ہے، بے گھر صحافیوں کیلئے اپنی چھت کا خواب پورا کرنے کیلئے پرعزم ہیں۔
انہوں نے کہا کہ یہ دن منانے کا مقصد حق اور سچ کی پاداش میں قتل ہونے یا تکلیفیں سہنے والے صحافیوں کو یاد کرنا ہے، پنجاب میں صحافی اور صحافت محفوظ ہے، اللہ کے فضل و کرم سے یہاں صحافیوں کے قتل و تشدد کے واقعات نہ ہوئے نہ ہی ہوں گے۔
