وزیراعلی مریم نواز نے پنجاب پراپرٹی آرڈیننس 2025ء کی منظوری دے دی، آرڈیننس کے تحت زمین و جائیداد کے فیصلے 90 دن میں ہوں گے۔
ذرائع کے مطابق جمعہ کو وزیراعلی مریم نواز کی زیر صدارت اجلاس ہوا جس میں عوام کی ملکیت کے تحفظ کیلئے پنجاب پروٹیکشن آف اونرشپ آف ام موویبل پراپرٹی آرڈیننس 2025ء کی منظوری دی گئی۔
نئے نظامِ انصاف کے تحت پنجاب کے ہر ضلع میں ڈسپیوٹ ریزولیشن کمیٹیاں قائم کی جائیں گی جو زمین یا جائیداد کے تنازعات کا فیصلہ عدالت جانے سے قبل ہی 90روز میں فیصلے کریں گی، ان کمیٹیوں کے فیصلے کی اپیل ہائیکورٹ کے ریٹائرڈ جج کی سربراہی میں قائم خصوصی ٹربیونل میں سنی جائے گی اور وہ بھی اپیل کا فیصلہ 90دن کے اندر کرنے کا پابند ہوگا۔
6رکنی ضلعی تصفیہ کمیٹی کی سربراہی ڈپٹی کمشنر کرے گا جبکہ ڈی پی او اور دیگر متعلقہ حکام بھی اس کا حصہ ہوں گے، کمیٹیوں کو 30دن کے اندر فعال کرنے کا ہدف مقرر کیا گیا ہے تاکہ برسوں سے عدالتوں کے چکر کاٹنے والے سائلین کو برق رفتار انصاف مل سکے۔
اجلاس میں ریاستی رِٹ اور عوامی حق ملکیت کے تحفظ کیلئے نئی مثال قائم کرنے کا فیصلہ کیا گیا جس کے مطابق کیس کے فیصلے کے بعد 24گھنٹوں کے اندر قبضہ مافیا سے زمین واگزار کرائی جائے گی، مقصد کیلئے پیرا فورس کی خدمات حاصل کرنے کی سفارش پر بھی غور کیا گیا، مزید شفافیت کیلئے ڈیجیٹل ریکارڈنگ اور سوشل میڈیا پر لائیو اسٹریمنگ کی تجاویز کا بھی جائزہ لیا گیا۔
اس موقع پر گفتگو کرتے ہوئے وزیراعلی نے کہا کہ پنجاب میں اب کوئی کسی کی زمین نہیں چھین سکے گا کیونکہ ماں جیسی ریاست ہر کمزور کیساتھ کھڑی ہے۔
انہوں نے کہا کہ جس کی ملکیت اسی کا حق ہے، قبضہ مافیا کا باب ہمیشہ کیلئے بند کر دیا گیا ہے، عام آدمی کیلئے چھوٹی سی جائیداد اس کی کل کائنات ہوتی ہے ،حکومت نے اب اس کے تحفظ کو یقینی بنا دیا ہے۔
