ویمن ورلڈ کپ میں بنگلادیش اور پاکستان کے میچ کی کمنٹیٹر ثنا میر نے کہا ہے کہ پاکستانی کھلاڑی تنالیہ پرویز کے آبائی علاقے سے متعلق بات کرنے کا مقصد ان کی مشکلات اور شاندار سفر کو اجاگر کرنا تھا، میرے دل میں کوئی بغض یا کسی کے جذبات کو ٹھیس پہنچانا مقصد نہیں۔
سوشل میڈیا پر جاری بیان میں ثنا میر نے کہا کہ افسوس کی بات ہے کہ اس معاملے پر عوامی سطح پر وضاحت دینا پڑرہی ہے تاہم بطور کمنٹیٹر یہ ہماری کہانی بیان کرنے کا حصہ ہے کہ کھلاڑی کہاں سے آتے ہیں، 2 اور ریجنوں سے تعلق رکھنے والی کھلاڑیوں کا بھی ذکر کیا، یہ افسوسناک ہے کہ معاملات کو بڑھا چڑھا کر پیش کیا جا رہا ہے۔
سابق کرکٹر نے لکھا اس معاملے کو سیاسی رنگ نہ دیا جائے، کھیلوں سے وابستہ افراد کو غیر ضروری دباو کا سامنا کرنا پڑ رہا ہے۔
واضح رہے آئی سی سی ویمن ورلڈکپ میں بنگلا دیشں اور پاکستان کے میچ کے دوران کمنٹیٹر ثنا میر کی جانب سے آزاد کشمیر سے تعلق رکھنے والی پاکستانی کرکٹر کا تعارف کرایا گیا، تنالیہ پرویز کا تعلق آزاد کشمیر سے ہے۔
کمنٹری کے دوران ثنا میر کا آزاد کشمیر کہنا بھارتیوں کو ایک آنکھ نہ بھایا جس کے بعد بھارت میں ثنا میر کے خلاف پروپیگنڈا اور نفرت انگیز مہم شروع کردی گئی۔
