وزیر اعظم شہباز شریف نے آزاد کشمیر کی صورتحال پر تشویش کا اظہار کرتے ہوئے کہا ہے کہ پرامن احتجاج ہر شہری کا آئینی و جمہوری حق ہے، مظاہرین امن عامہ کو نقصان پہنچانے سے گریز کریں۔
ذرائع کے مطابق وزیراعظم نے مظاہروں کے دوران پیش آنیوالے ناخوش گوار کی شفاف تحقیقات کا حکم دیا جبکہ احتجاجی مظاہروں سے متاثرہ خاندانوں تک فوری امداد پہنچانے کی ہدایت کی ہے۔
وزیراعظم نے کہا کہ قانون نافذ کرنے والے ادارے مظاہرین کے ساتھ تحمل اور بردباری کا مظاہرہ کریں، عوامی جذبات کا احترام یقینی بنائیں اور کسی بھی قسم کی غیر ضروری سختی سے اجتناب برتیں جبکہ مظاہرین بھی امن عامہ کو نقصان پہنچانے سے گریز کریں۔
وزیراعظم نے کہا کہ احتجاج ہر شہری کا آئینی و جمہوری حق ہے ،حکومت کشمیری بھائیوں کے مسائل حل کرنے کیلئے تیار ہے۔ وزیراعظم نے سینیٹر رانا ثنا اللہ، وفاقی وزرا سردار یوسف، احسن اقبال، سابق صدر آزاد جموں و کشمیر مسعود خان اور قمر زمان کائرہ کو بھی مذاکراتی کمیٹی میں شامل کرتے ہوئے مظفر آباد جا کر مسائل کا فوری اور دیرپا حل نکالنے کی ہدایت کی۔
وزیر اعظم نے کا کہ ایکشن کمیٹی اراکین اور قیادت حکومتی مذاکراتی کمیٹی سے تعاون کرے،سفارشات اور مجوزہ حل بلا تاخیر وزیراعظم آفس بھجوایا جائے تاکہ مسائل کے فوری تدارک کیلئے اقدامات کیے جا سکیں۔
