وفاقی وزیر داخلہ محسن نقوی نے سی پیک کو پاک چین عظیم شراکت داری کی روشن مثال قرار دیتے ہوئے کہا ہے کہ پاک چین سٹرٹیجک شراکت داری خطے میں توازن اور ترقی کی بنیاد ہے، چین نے پاکستان کی معاشی بنیادوں کو مستحکم کرنے میں کلیدی کردار ادا کیا، تعلقات ہماری خارجہ پالیسی کا مستقل و مرکزی ستون ہیں۔
جاری بیان کے مطابق عوامی جمہوریہ چین کے 76ویں قومی دن پر چینی قیادت، کیمونسٹ پارٹی اور عوام کو مبارکباد دیتے ہوئے محسن نقوی نے کہا کہ چین استقامت،اصولوں کی پاسداری اور اجتماعی فلاح کے جذبے سے اقوام عالم میں بلند مقام پر پہنچا ،چین کی معاشی،سماجی اور عسکری میدان میں غیر معمولی کامیابیاں خطے کیلئے ترقی و استحکام کا باعث ہیں۔
محسن نقوی نے کہا کہ چینی قیادت نے مختصر مدت میں معاشی استحکام اور پائیدار ترقی کے خواب کو عملی تعبیر دی ہے۔انہوں نے کہا کہ چین کی شاندار تاریخ، ثقافتی ورثے اور حیرت انگیز ترقی پر چینی قیادت اور عوام کو خراج تحسین پیش کرتا ہوں۔
انہوں نے کہا کہ پاک چین تعلقات تاریخی، سٹریٹیجک اور مضبوط شراکت داری پر مبنی ہیں، سی پیک جیسے عظیم منصوبے پاک چین عظیم شراکت داری کی روشن مثال ہیں۔ انہوںنے کہا کہ ہمالیہ کی فلک بوس چوٹیاں، سمندر کی گہرائیاں اور قراقرم کی سنگلاخ راہیں پاک چین لازوال دوستی کی گواہ ہیں، چین نے ہر بحران، علاقائی تنائو یا داخلی چیلنج میں پاکستان کا بھرپور ساتھ دیا۔
انہوں نے کہا کہ چین کیساتھ تعلقات پاکستان کی خارجہ پالیسی کا مستقل اور مرکزی ستون ہیں، گوادر سے خنجراب تک، توانائی سے مواصلات تک، چین نے پاکستان کی معاشی بنیادوں کو مستحکم کرنے میں کلیدی کردار ادا کیا ہے۔
انہوں نے کہا کہ پاک چین سٹرٹیجک شراکت داری خطے میں توازن اور ترقی کی بنیاد ہے، قومی دن پر چینی قوم کی لگن، محنت اور جدت پسندی کو سلام پیش کرتے ہیں اور چینی قوم کی مزید ترقی، کامرانی اور عروج کیلئے دعا گو ہیں۔
