وزیراعظم شہباز شریف نے چین کی ترقی کو دنیا کیلئے مشعل راہ قرار دیتے ہوئے کہاہے کہ پاک چین رشتہ خلوص، اعتماد اور قربانی کا مظہر، آنیوالی نسلوں کیلئے امن، ترقی اور خوشحالی کی ضمانت ہے۔
جمہوریہ چین کے 76ویں قومی دن کے موقع پر وزیراعظم شہباز شریف نے حکومت اور پاکستانی عوام کی جانب سے چینی قیادت اور برادر عوام کو مبارکباد دیتے ہوئے کہا ہے کہ اس مبارک دن پر میں چینی عوام کی ترقی، خوشحالی اور کامیابی کیلئے دعاگو ہوں۔
وزیراعظم نے کہا کہ یہ دن نہ صرف چین کے شاندار قومی سفر کی یاد دہانی ہے بلکہ ایک عظیم قوم کی ترقی، استحکام اور عالمی سطح پر امن کے قیام میں چین کے کردار کا بھی اعتراف ہے۔ انہوںنے کہا کہ صدر شی جن پھنگ کی بصیرت افروز اور مثالی قیادت میں چین نے ترقی و خوشحالی کے ایسے سنگ میل عبور کئے یں جو دنیا کیلئے روشن مثال ہیں۔
انہوں نے کہا کہ پاکستان اور چین کی دوستی لازوال اور ناقابل شکست رشتہ ہے جو وقت گزرنے کے ساتھ مزید مضبوط ہوا ہے، باہمی اعتماد، قربانی اور اخلاص پر مبنی رشتہ ہماری آنے والی نسلوں کیلئے امن، ترقی اور خوشحالی کی ضمانت ہے۔
وزیراعظم نے کہا کہ میرا حالیہ دورہ چین انتہائی مفید اور نتیجہ خیز رہا،دورے میں دو طرفہ تعلق کے ضمن میں شنگھائی تعاون تنظیم کے اجلاس اور بی ٹو بی کانفرنس میں اربوں ڈالر کی سرمایہ کاری کے معاہدوں جیسے تاریخی سنگ میل عبور کئے۔
انہوں نے کہا کہ چین پاکستان اقتصادی راہداری ہمارا چین کے ساتھ انتہائی اہم مشترکہ معاشی منصوبہ ہے جو اب اپنے دوسرے مرحلے میں داخل ہو چکا ہے۔
وزیراعظم نے کہا کہ پاکستان چین کیساتھ اپنے برادرانہ تعلقات پر فخر کرتا ہے ،ہم پرامید ہیں کہ دونوں ممالک اپنی دوستی اور شراکت داری کو نئے سنگ میل تک لے کر جائیں گے۔
