وزیراعظم شہباز شریف نے تنازعات کے خاتمے کیلئے مخلصانہ کوششوں پر امریکی صدر کو امن کا علمبردار قرار دیتے ہوئے امید ظاہر کی ہے کہ ڈونلڈ ٹرمپ کی قیادت میں پاک امریکہ تعلقات مزید مستحکم ہوں گے جبکہ امریکی کمپنیوں کو پاکستان کے زراعت، آئی ٹی، معدنیات اور توانائی شعبوں میں سرمایہ کاری کی دعوت دیتے ہوئے سیکیورٹی اور انٹیلی جنس شعبوں میں مزید تعاون بڑھانے پر زور دیا ہے۔
جاری اعلامئے کے مطابق وزیراعظم شہبازشریف نے فیلڈ مارشل عاصم منیر کے ہمراہ وائٹ ہائوس میں امریکی صدر ڈونلڈ ٹرمپ سے خوشگوار ماحول میں ملاقات کی ۔وزیراعظم نے پاکستان اور بھارت کے درمیان جنگ بندی میں صدر ٹرمپ کی دلیرانہ، جراتمندانہ اور فیصلہ کن قیادت کو سراہا جس سے جنوبی ایشیا میں ایک بڑے سانحے سے بچائو ممکن ہوا۔
وزیراعظم نے غزہ جنگ بندی کیلئے امریکی صدر کی کوششوں کو سراہا، خصوصا رواں ہفتے غزہ اور مغربی کنارے میں امن بحالی پر تبادلہ خیال کیلئے نیویارک میں مسلم دنیا کے اہم رہنمائوں کو مدعو کرنے کی تعریف کی۔
وزیراعظم امریکہ اور پاکستان کے درمیان رواں سال طے پانے والے ٹیرف معاہدے پر بھی امریکی صدر کا شکریہ ادا کرتے ہوئے امید ظاہری کی کہ صدر ٹرمپ کی قیادت میں پاک امریکہ تعلقات مزید مستحکم ہوں گے جو دونوں ممالک کیلئے سودمند ہوں گے۔
اس موقع پر وزیراعظم نے امریکی کمپنیوں کو پاکستان کے زراعت، آئی ٹی، معدنیات اور توانائی کے شعبوں میں سرمایہ کاری کی دعوت دی۔ ملاقات میں دونوں رہنمائوں نے علاقائی سیکیورٹی اور انسدادِ دہشت گردی کے شعبے میں تعاون پر بھی بات چیت کی، وزیراعظم نے انسدادِ دہشت گردی میں پاکستان کے کردار کی امریکی صدر کی طرف سے کی گئی عوامی توثیق پر ان کا شکریہ ادا کیا اور سکیورٹی اور انٹیلی جنس کے شعبے میں مزید تعاون بڑھانے کی ضرورت پر زور دیا۔
اعلامئے کے مطابق وزیراعظم نے امریکی صدر ڈونلڈ ٹرمپ کو پاکستان کے سرکاری دورے کی دعوت بھی دی۔
