لاہور: اداکارہ صائمہ قریشی نے ایک بار پھر مردوں کی دوسری شادی کے حوالے سے کہا ہے کہ مردوں کو غیر ازدواجی تعلقات قائم کرنے کے بجائے نکاح کو ترجیح دینی چاہیے، میرے مطابق 95 فیصد مرد دوسری شادی کے خواہاں ہوتے ہیں۔
ایک پوڈ کاسٹ میں گفتگو کرتے ہوئے انہوں نے کہا کہ جب مرد غیر ازدواجی تعلقات قائم کرتے ہیں تب تو وہ نہیں ڈرتے، لہذا اگر وہ نکاح کریں اور اپنی بیوی کو اعتماد میں لے لیں تو یہ زیادہ بہتر ہے۔
انہوں نے کہا کہ دوسری شادی کے لیے پہلی بیوی کی اجازت لینا دین میں لازم نہیں ہے، تاہم پہلی بیوی کو آگاہ ضرور کرنا چاہیے، کئی ایسی خواتین بھی موجود ہیں جو اپنے شوہروں کی دوسری شادی خود کرواتی ہیں اور اس طرح کی مثالیں میڈیا میں بھی نظر آتی ہیں۔
انہوں نے مزید کہا کہ میںنے خود کئی ایسے مرد دیکھے ہیں جو اپنی دونوں بیویوں کو ساتھ رکھتے ہیں۔
انہوں نے کہا اگر کوئی مرد کسی کے احساسات کے ساتھ کھیلتا ہے یا جھوٹے خواب دکھاتا ہے تو اسے یہ سوچنا چاہیے کہ اس کی اپنی اولاد بھی بڑی ہو رہی ہے، اس لیے بہتر یہی ہے کہ غلط یا حرام تعلقات رکھنے کے بجائے نکاح کرلیا جائے انہوں نے کہا کہ اگر مردوں کو افیئرز چلانے کا شوق ہے تو ان کے لیے بہتر ہے کہ وہ کسی کی ذمہ داری لیں، کیونکہ ایک مرد کی غلط حرکت پوری نسل کو تباہ کر سکتی ہے۔
