پشاور: پشاور ہائیکورٹ کو بتایا گیا ہے کہ وفاق میں علی امین کیخلاف 48 مقدمات درج جبکہ ایف آئی اے کی2 انکوائریاں بھی ہیں جبکہ عدالت نے وزیراعلی کی حفاظتی ضمانت میں 3 ہفتوں کی توسیع کرتے ہوئے گرفتار نہ کرنے کا حکم دیا ہے۔
منگل کو پشاور ہائیکورٹ میں جسٹس صاحبزادہ اسد اللہ اور جسٹس محمد اعجاز خان پر مشتمل ڈویژن بینچ نے علی امین کی مقدمات کی تفصیلات فراہمی درخواست پر سماعت کی۔ دوران سماعت اسسٹنٹ اٹارنی جنرل نے عدالت کو بتایا کہ وزیراعلی علی امین گنڈاپور کیخلاف وفاق کے 48مقدمات ہیں جبکہ ایف آئی اے کی 2 انکوائریاں بھی ہیں، یہ وزیراعلی ہیں، ان کی درخواست نمٹا دیں، اچھا نہیں لگتا بار بار آئیں۔
جسٹس صاحبزادہ اسد اللہ نے ریمارکس دیئے کہ کاش آپ یہ بات خلوص دل سے کرتے۔ ایڈیشنل ایڈووکیٹ جنرل نے بتایا کہ اینٹی کرپشن کی رپورٹ ابھی تک نہیں آئی۔ جسٹس صاحبزادہ اسد اللہ نے کہا کہ وزیراعلی کو ہم پیشی سے استثنیٰ دیتے ہیں ان کے وکیل پیش ہوں۔
بعد ازاں عدالت نے علی امین کی حفاظتی ضمانت میں 3 ہفتوں کی توسیع کرتے ہوئے درج مقدمات گرفتار نہ کرنے کا حکم دیتے ہوئے فریقین سے رپورٹ طلب کرلی اور کیس کی سماعت 16 اکتوبر تک ملتوی کردی۔
