اسلام آباد: وزیراعظم شہباز شریف نے سعودی عرب کیساتھ دیرپا شراکت داری کو مزید مستحکم بنانے کے عزم کا اعادہ کرتے ہوئے کہا ہے کہ پاکستانی عوام معیشت کو سہارا دینے کے سعودی معاشی تعاون کو فراموش نہیں کر سکتے، دونوں ممالک کے درمیان تعلقات ہمیشہ قائم و دائم رہیں گے۔
جاری بیان میں وزیراعظم نے کہا کہ پاکستان کے عوام اور حکومت کی جانب سے خادم الحرمین الشریفین شاہ سلمان بن عبدالعزیز آل سعود، ولی عہد و وزیراعظم شہزادہ محمد بن سلمان بن عبد العزیز آل سعود اور اپنے عزیز سعودی بھائیوں ،بہنوں کو قومی دن پر مبارکباد پیش کرتا ہوں۔
انہوں نے کہا کہ ریاض کے حالیہ تاریخی دورے کے دوران مجھے اور پاکستانی وفد کو ملنے والا والہانہ استقبال اور محبت سے بھرپور مہمان نوازی کو اپنے لئے انتہائی خوشی اور افتخار کا باعث سمجھتا ہوں اور اس پر سعودی قیادت و عوام کا شکر گزار ہوں۔
وزیراعظم نے کہا کہ پاکستان اور سعودی عرب کے مابین تعلقات دین اسلام، تاریخ، بھائی چارے اور اعتماد کی بنیاد پر قائم ہیں جو ہمیشہ قائم و دائم رہیں گے، ہم اپنے سعودی بھائیوں اور بہنوں کے ساتھ مل کر سعودی عرب کے عظیم الشان ترقیاتی سفر پر فخر کرتے ہیں جو شہزادہ محمد بن سلمان کی بصیرت افروز قیادت میں جاری ہے۔
انہوں نے کہا کہ آج سعودی عرب عالمی برادری میں جس بلند مقام پر فائز ہے وہ اس بصیرت اور دانشمندی کی روشن مثال ہے۔ وزیر اعظم نے کہا کہ مئی 2025 میں بھارت کیساتھ کشیدگی کے دوران سعودی قیادت اور عوام کی طرف سے اظہار یکجہتی کو پاکستانی قوم ہمیشہ یاد رکھے گی، پاکستانی عوام سعودی عرب کے معاشی تعاون کو بھی فراموش نہیں کر سکتے جس کی وجہ سے ہماری معیشت کو سہارا ملا۔
انہوں نے کہا کہ لاکھوں پاکستانی سعودی عرب کو اپنا دوسرا گھر سمجھتے ہیں اور وہاں کی تعمیر و ترقی میں سرگرم عمل ہیں۔ انہوں نے کہا کہ پاکستانی برادری کی سعودی عرب میں خدمات دونوں برادر ممالک کے مابین خوشگوار تعلقات، خوشحالی اور ترقی کا باعث ہیں۔
انہوں نے کہا کہ پاکستان سعودی عرب کیساتھ دیرپا شراکت داری کو مزید مستحکم بنانے کیلئے پرعزم ہے، دعا ہے اللہ مملکت سعودی عرب کو مزید عظمت وترقی عطاء فرمائے ۔
