اسلام آباد: وفاقی وزیر داخلہ محسن نقوی نے کہا ہے کہ سعودی عرب کی ترقی پاکستان کیلئے فخر و حوصلے کا باعث ہے، اسلام اور مسلمانوں کی خدمت کیلئے شاہی خاندان کی خدمات فراموش نہیں کی جاسکتی، پاک سعودیہ دفاعی تعاون معاہدے نے تاریخی تعلقات کو نئی جہت دی ہے، اقتصادی اور ثقافتی شراکت داری نے باہمی تعلقات کو نئی بلندیوں تک پہنچایا ہے۔
سعودی عرب کے قومی دن کے موقع پر وزیر داخلہ محسن نقوی نے خادم الحرمین شریف شاہ سلمان بن عبدالعزیز، ولی عہد محمد بن سلمان، شاہی خاندان اور سعودی عوام کو مبارکباد دیتے ہوئے کہا ہے کہ سعودی قیادت، سعودی سفیر اور عوام کیلئے خیر سگالی اور نیک خواہشات کا اظہار کرتا ہوں، ولی عہد محمد بن سلمان کی ولولہ انگیز قیادت میں سعودی عرب نے ترقی کے سنگ میل عبور کئے ہیں۔
انہوں نے کہا کہ سعودی عرب کی ترقی پاکستان کیلئے فخر اور حوصلے کا باعث ہے، اسلام اور مسلمانوں کی خدمت کیلئے سعودی عرب کے شاہی خاندان کی خدمات کو فراموش نہیں کیا جا سکتا۔انہوں نے کہا کہ پاک سعودیہ تعلقات دو بھائیوں کی وہ مقدس میراث ہے جو دلوں کی گہرائیوں سے جڑی ہوئی ہے، ایک دوسرے کیلئے قربانی، وفا اور خلوص کے رشتے نے اس دوستی کو ہر آزمائش میں سرخرو کیا ہے۔
انہوں نے کہا کہ پاکستان اور سعودی عرب کا روحانی و ثقافتی تعلق جغرافیے سے ماورا ہے، سعودی حکومت نے ہر موقع پر پاکستان کے ساتھ بے لوث دوستی کا ثبوت دیا ہے، چاہے قدرتی آفات ہوں یا عالمی چیلنجز۔
انہوں نے کہا کہ پاک سعودیہ دفاعی تعاون معاہدے نے تاریخی تعلقات کو نئی جہت دی ہے، دفاعی، اقتصادی اور ثقافتی شراکت داری نے باہمی تعلقات کو نئی بلندیوں تک پہنچادیا ہے۔ انہوں نے کہا کہ پاکستان اور سعودی عرب کے مابین گہرے اور دیرینہ تعلقات ہمیشہ قائم و دائم رہیں گے۔
وزیر داخلہ نے کہا کہ پاکستانی قوم سعودی عرب کی سلامتی، استحکام اور خوشحالی کیلئے دل کی گہرائیوں سے دعاگو ہے۔
