ڈی جی آئی ایس پی آر لیفٹیننٹ جنرل احمد شریف چودھری نے کیڈٹ کالج پلندری کے دورہ کے دوران پاکستان کی دفاعی صلاحیتوں اور وطن عزیز کی حفاظت کیلئے پاک فوج کے کردار پر روشنی ڈالی۔ طلبا اور اساتذہ کے ساتھ خصوصی نشست منعقد کی گئی۔
معرکہ حق میں بھارت کو ذلت آمیز شکست دینے پر شرکا نے افواج پاکستان کو شاندار خراجِ تحسین پیش کیا۔ کالج کے طلبا اور اساتذہ نے مدلل اور مفصل جوابات پر ڈی جی آئی ایس پی آر کا شکریہ ادا کیا۔
پرنسپل کیڈٹ کالج پلندری کا کہنا تھا کہ ڈی جی آئی ایس پی آر کی گفتگو اور عزم نے ہمارے حوصلوں کو مزید تقویت دی ہے۔خصوصی نشست میں شرکا کا کہنا تھا کہ ہمیں سوشل میڈیا پر کسی بھی خبر کو بغیر تحقیق کے نہیں ماننا چاہیے
اور ہمیں بطور ذمہ دار شہری ہر خبر کی حقیقت کا جائزہ لینا ضروری ہے، ڈی جی آئی ایس پی آر کی گفتگو سے دفاعِ وطن کیلئے پاک فوج کے کردار اور قربانیوں کو جاننے کا موقع ملا۔ انہوں نے کہا کہ کیڈٹ کالج پلندری کے پہلے شہید میجر رب نواز طارق کی عظیم قربانی پر فخر ہے اور وہ ہر طرح کی بھارتی جارحیت کے خلاف افواج پاکستان کے شانہ بشانہ کھڑے ہیں۔
شرکا نے اس عزم کا اعادہ کیا کہ بھارت نے اگر دوبارہ کسی جارحیت کی کوشش کی تو اسے سخت ہزیمت اور رسوائی کا سامنا کرنا پڑے گا، "کشمیر پاکستان کی شہ رگ ہے” اور پاکستان اور کشمیر ایک ہیں، انہیں کوئی طاقت جدا نہیں کر سکتی، قائد اعظم محمد علی جناح کے فرمان کے مطابق کشمیر ہمیشہ پاکستان کا حصہ تھا، ہے اور رہے گا۔
