اسلام آباد: وفاقی حکومت نے ایف سی کا ہیڈکوارٹر پشاور سے اسلام آباد منتقل کرنے کا فیصلہ کرلیا۔
ہفتے کو وزیر داخلہ محسن نقوی کی زیر صدارت سی ڈی اے ہیڈکوارٹرز میں اہم اجلاس منعقد ہوا جس میں وزیر مملکت داخلہ طلال چودھری ،وفاقی سیکرٹری داخلہ، کمانڈنٹ و ڈپٹی کمانڈنٹ فیڈرل کانسٹیبلری، چیئرمین سی ڈی اے، آئی جی اسلام آباد، ڈی سی اسلام آباد اور سینئر حکام نے شرکت کی۔اجلاس میں ایف سی کا ہیڈکوارٹر پشاور سے اسلام آباد منتقل کرنے کا فیصلہ کیا گیا، وزیر داخلہ نے فیڈرل کانسٹیبلری کے ہیڈکوارٹرز کیلئے اراضی کی نشاندہی کی ہدایت کرتے ہوئے نئے ہیڈکوارٹرز کا ماسٹر پلان بھی طلب کرلیا۔
محسن نقوی نے کہا کہ ایف سی کو جدید بنیادوں پر استوار کر کے ایک منظم اور انتہائی فعال فورس بنانا چاہتے ہیں۔ انہوں نے حکم دیا کہ ایف سی ہیڈکوارٹرز کیلئے دارالحکومت میں موزوں جگہ مختص کی جائے ،زمین کی نشاندہی کے دوران ہیڈکوارٹرز اور ٹریننگ کی ضروریات کو خصوصی طور پر مدنظر رکھا جائے۔
