راولپنڈی: فیلڈ مارشل سید عاصم منیر نے سیلاب متاثرین کیساتھ بھرپور تعاون جاری رکھنے کے عزم کا اعادہ کرتے ہوئے کہا ہے کہ ریاست ہر سال قیمتی جانوں و املاک کے نقصان کی متحمل نہیں ہو سکتی، سیلاب نقصانات سے عوام کو محفوظ رکھنے کیلئے درکار انفراسٹرکچر کی ترقی سمیت تمام ضروری اقدامات فوری کئے جانے چاہئیں، متاثرین کی بحالی و آبادکاری کے عمل میں افواج پاکستان مکمل تعاون جاری رکھے گی۔
آئی ایس پی آر کے مطابق آرمی چیف نے قصور سیکٹر اور جلالپور پیر والا ملتان میں قائم فلڈ ریلیف کیمپ کا دورہ کیا، سیلاب متاثرہ علاقوں میں آمد پر فیلڈ مارشل سید عاصم منیر کا لاہور اور ملتان کور کے کور کمانڈرز نے استقبال کیا، آرمی چیف نے لاہور، قصور اور ملتان، جلالپور پیر والا کے سیلاب سے متاثرہ علاقوں کا فضائی جائزہ بھی لیا تاکہ نقصانات کے حجم اور جاری امدادی سرگرمیوں کا اندازہ لگایا جا سکے۔
سیلاب زدہ علاقوں میں پہنچنے پر فیلڈ مارشل کا استقبال لاہور اور ملتان کور کے کمانڈرز نے کیا۔ترجمان کے مطابق آرمی چیف کو زمینی صورتحال، متاثرہ علاقوں میں جاری ریسکیو و امدادی کارروائیوں بارے بریفنگ دی گئی۔
ترجمان پاک فوج کے مطابق قصور اور ملتان کے سیلاب زدہ علاقوں کے دورے کا مقصد سول انتظامیہ اور فوج کے درمیان ہم آہنگی کو مزید بہتر بنانا تھا تاکہ متاثرہ آبادی کو موثر امداد فراہم کی جا سکے، اس موقع پر چیف سیکرٹری پنجاب اور سول انتظامیہ کے دیگر اعلی حکام بھی موجود تھے۔
آئی ایس پی آر کے مطابق فیلڈ مارشل نے سول انتظامیہ سے گفتگو میں اچھی حکمرانی اور عوام پر مبنی شمولیتی ترقی کی اہمیت پر زور دیتے ہوئے کہا کہ بار بار آنے والے سیلاب کے نقصانات سے عوام کو محفوظ رکھنے کیلئے درکار انفراسٹرکچر کی ترقی سمیت تمام ضروری اقدامات فوری طور پر کئے جانے چاہئیں، ریاست ہر سال قیمتی جانوں اور املاک کے نقصان کی متحمل نہیں ہو سکتی۔
انہوں نے اس بات پر زور دیا کہ سیلاب متاثرہ افراد کو درپیش چیلنجز سے نمٹنے کیلئے سول اور فوجی اداروں کی مربوط کوششیں انتہائی اہم ہیں ، انہوں نے اس عزم کا اعادہ کیا کہ پاک فوج عوامی فلاح کے تمام اقدامات کی بھرپور حمایت جاری رکھے گی۔فیلڈ مارشل نے سیلاب متاثرین سے گفتگو کرتے ہوئے ان کی بحالی اور آبادکاری کے عمل میں مکمل تعاون کی یقین دہانی ،متاثرین نے بروقت امداد فراہمی پر پاک فوج کا دل کی گہرائیوں سے شکریہ ادا کیا۔
ترجمان کے مطابق آرمی چیف نے ریلیف آپریشنز میں مصروف فوجی جوانوں، ریسکیو 1122 اہلکاروں اور پولیس حکام سے بھی ملاقات کی، ان کے بلند حوصلے، آپریشنل تیاری اور انتہائی کٹھن حالات میں قوم کی خدمت کیلئے غیر متزلزل عزم کو سراہا۔ آرمی چیف نے سول انتظامیہ کیساتھ قریبی رابطے میں عوام کو بروقت ریلیف و امداد فراہم کرنے کیلئے کئے جانیوالے ان کے دن رات کے کاموں کی بھی تعریف کی۔
