لاہور: پاکستان ویمن کرکٹ ٹیم کی بیٹر ایمان فاطمہ نے کہاہے کہ ون ڈے ٹیم میں پہلی مرتبہ نام آنے پر پرجوش ہوں، ورلڈ کپ کھیلنے کا خواب پورا ہو رہا ہے۔
اپنے ایک بیان میں انہونے کہا کہ ورلڈ کپ کھیلنا ہر کسی کا خواب ہوتا ہے، میرا بھی خواب پورا ہو رہا ہے، کوشش ہو گی کہ اس کو یادگار بناوں، کیمپس کے دوران بیٹنگ اور فیلڈنگ پر کام کیا ہے، میں نے اپنی فٹنس کو بہتر کرنے کے لیے بہت محنت کی ہے۔
انہوں نے کہا کہ ون ڈے ٹیم میں میرا نام پہلی مرتبہ آیا ، اس سے قبل میں نے آئر لینڈ کے خلاف ٹی ٹوئنٹی سیریز کھیلی ہے۔ پاور ہٹر ایمان فاطمہ نے کہا کہ شروع سے شاہد آفریدی کو دیکھا ہے، انہی کی طرح بننے کی کوشش کر رہی ہوں، کوشش ہوتی ہے جس انداز سے شاہد آفریدی کھیلتے تھے اسی طرح کھیلوں۔
انہوں نے کہا کہ اپنے رول کے مطابق کھیلوں گی، پاور ہٹنگ پر بہت کام کیا ہے، شاٹس سلیکشن کو بہتر بنایا ہے، کوشش یہی ہے کہ پلان اور اس وقت ٹیم کی ضرورت کے مطابق کھیلوں۔
انہوں نے کہا کہ ویمن کرکٹرز کی بات کروں تو آسٹریلیا کی ایلس پیری سے بہت متاثر ہوں، بہت کچھ سیکھنے کو ملتا ہے جبکہ اپنی ٹیم کی کھلاڑیوں سے بھی متاثر ہوں، کپتان فاطمہ ثنا اچھی آل راونڈر ہیں۔
