واشنگٹن: وائٹ ہاوس کے سینئر قونصلر برائے ٹریڈ اینڈ مینوفیکچرنگ پیٹر ناوارو نے بھارت اور یوکرین کی پالیسیوں پر سخت تنقید کرتے ہوئے کہا ہے کہ روس یوکرین اصل میں مودی کی جنگ ہے، امریکا کو اس کے اثرات بھگتنا پڑ رہے ہیں۔
امریکی میڈیا کو انٹرویو میں انہوں نے کہا کہ بھارت روس سے تیل خرید کر یوکرین جنگ میں بالواسطہ طور پر روس کو مالی فائدہ پہنچا رہا ہے جس کا نقصان امریکا کو ہو رہا ہے۔
یوکرین کے حوالے سے پیٹر نوارو نے کہا کہ یورپی ملک مسلسل امریکا سے مزید مالی امداد کا مطالبہ کر رہا ہے جس کے باعث امریکی صارفین، کاروبار اور محنت کش طبقہ شدید متاثر ہو رہا ہے۔ انہوں نے یہ بھی کہا کہ اگر بھارت نے تجارتی اصلاحات نہ کیں تو عالمی سطح پر امن و استحکام کی کوششوں کو نقصان پہنچ سکتا ہے۔
انہوں نے کہا کہ بھارت کی جانب سے عائد بھاری ٹیرف امریکی ملازمتوں کے خاتمے، فیکٹریوں کی بندش اور آمدنی میں کمی کا باعث بن رہا ہے، جس کا براہِ راست اثر امریکی ٹیکس دہندگان پر پڑ رہا ہے۔
